An intiamna Rs 3,00,000 aia tlem lo sem hi mipui laka an bat a ni - Duhoma

ZPM leader Lalduhoma chuan, MNF intiamna chu chhung tin hnena Rs 3,00,000 sem a nih avangin, chhung tin hnena cheng nuai thum sem chu mipui laka an bat a nih thu a sawi.

Lalduhoma hian September 2, Zirtawpni zan khan Lallen khuaah leh Inrinni khan West Phaileng leh Rawpuichhipahte vantlang inkhawmah thu a sawi a, "Kum 2018 inthlan dawna cheng nuai 3 leh a aia tam sem min tiamtute'n an sorkar aṭanga kum linaah Rs 25,000 a thuin an sem mek. Nuai thum sem min tiam a, cheng nuai thum hi mipuite hnenah an sem ngei tur a ni," a ti.

ZPM Leader chuan, tihhlawhtlin theih loh tur hmanga mipui bum chunga ram kaihhruai tum tur a ni lo tih sawiin, "Intiamna chu intiamna a ni a, chhung tin hnena cheng nuai 3 sem hi mipui hnena an intiamna, mipui laka an bat a ni. Tuna an kal dan, kum li dana Rs 25,000 pek tum hian awmzia a nei lo," a ti a; kum li chhunga Rs 25,000 an pek dawn chuan, Rs 3,00,000 pe turin kum 48 chhung a ngaih dawn thu a sawi.

Mizoram chu India rama state pachhe ber zinga mi a ni a, kum 2022-23 Mizoram budget cheng vbc. 14,008.15-a Mizoram thawh ve chu vbc. 1,637.73 (11.69%) chauh a nih thu sawiin Duhoma chuan, "Hetiang hi kan dinhmun a nih laia sem policy hmanga inawih nun tum party-te hi mipuite'n kan hnâwl a hun tawh. Rs 3,00,000 sem tur hian kan budget-in a daih lo, kan dinhmun hre reng chungin rorelna fawng chelh duh luatah mipui min bum hi pawi an ti lo a ni," a ti.

Lalduhoma chuan, "ZPM a sorkar chuan hna hmasaah inrenchemna kalpui a ni ang a, state sum thawh chhuah tipung turin nasa takin beihpui a thlâk dawn a ni," a ti a; mipui vantlang hriselna an ngai pawimawh dawn thu te, damdawi-in zawng zawng tihchangtlun a nih dawn thu te, district hospital tinah ICU changtlung tak a awm theih nan hma an la ang a, On-Call Clinic hawn a nih dawn thute a sawi.

ZPM Leader hian Rawpuichhip Hmunhlui tlanga Eco-Tourism Circuit hluihlâwm/pàmṭùl tawh a tlawh bawk a; ram hmélhmang lanna tur hmasawnna pàmṭùl a ni chu pawi a tih thu a sawi a ni.

Lalduhoma hian West Phaileng, Kawnmawi, Chhippui leh Rawpuichhip khua aṭangin ZPM zawm thar mi 247 a lawm lut niin ZPM thuchhuah chuan a tarlang.