Chief minister Zoram-thanga chuan nimin khan CMO Conference Hall-ah thuthar thehdarhtute a kâwm a, bamboo link road (economic road) atan cheng vbc. 100 hù detailed project report (DPR) siam sorkar laipuiin an remtihsak thu a sawi a, state sorkarin a duh chuan Smart City hnuaiah kawng chhâwng (elevated road) a telh theih thu a sawi bawk.

CM Zoramthanga chuan, tun hnaia Delhi-a a zinnaah Union Finance Minister hnenah bamboo link road mamawhna a sànzia a thlen tih sawiin, "Finance Minister hian Finance Secretary kutah a dah tawh thu min hrilh angin Finance Secretary pawh ka kâwm. Finance Secretary hi thla kaw mi nau vei mek, hring chhuaktu tur (head of account) an siam a ngaih thu ka hrilh a, ani pawh a tui em em a ni," a ti.

Union Finance Secretary hian a hmin (convince) thu a hrilh nia sawiin Zoramthanga chuan, "Finance Secretary hian a bul ṭanna atan cheng vbc. 100 hù DPR siam a, theh thla turin min hrilh," a ti a, DPR chu thla khat chhunga peih tura hma an lak dawn thu a sawi.

CM Zorama chuan, bamboo link road atan mamawh zat tur hriat theih a la nih loh thu sawiin, "Chíng duh zat leh chíng duh khuate'n link road an mamawh zat azir a ni ang. Bamboo link road kan ti nã a, economic road a ni zawk mah. Agriculture leh horticulture lamin an chhawr vek tur a ni. Economic road tih chuan state dangin an rawn chuh ve ang a, an thàl ve theih loh turin a hming kan vuah a ni," a ti.

Chief Minister chuan, prime minister Narendra Modi nen central-a UPA an sorkar laiin kum 10 chhung chief minister an nih ho tawh thu sawiin, "Kan innél dûn a, kan inkâwm pawh kan hlim khawp mai, a boruak a nuam," a ti a, cameraman-te pawhin kan inkawm ṭum anga Modi-a a nuih nasat an hriat loh thu an hrilh tih a sawi.

All India service cadre hrang Mizoramin a neih a ṭulzia a sawi tih sawiin CM chuan, "A hmaa in nei ngei ngei tur a ni, an tih tawh avangin min pe ngei turin ka nawr. Secretary in-charge hnenah file kaltir leh tura hrilh turin ka thlen a ni," a ti.

Zoramthanga chuan, Mizo ṭawng thiam ngei chief secretary dah chungchang PM hnenah a thlen thu sawiin, "Kan CS hi a mimalah a ṭha em em a, hrawn pawh a nuam. Mahse, Cabinet-ah Mizo ṭawng vekin kan ṭawng a, a tàwpah ka brief (hrilhfiah) leh ṭhin a, a fuh thei lo. PM hi CM a nih laiin, Gujarati thiam lo CS nei se a buai dan tur ka hrilh a, a pawm viau," a ti a; a ngenna chu PM-in tihhlawhtlin a tum thu a hrilh niin a sawi.

Chief Minister chuan, Housing and Urban Affairs minister Hardeep Singh Puri hnenah Vaivakawn leh Bawngkawna flyover bridge siam leh Chaltlang Bus Terminal chungchang a thlen thu sawiin, "A thuphungin pawmpuina min pe tawh a, DPR buatsaihna atan cheng nuai 68 min pek a tiam a, kan hmuh vat ka ring. DPR siam zawh veleh kan theh thla ang," a ti.

Zawhna chhangin CM Zoramthanga chuan, Smart City project hnuaiah Vaivakawn leh Bawngkawna flyover bridge siam, Chaltlang Bus Terminal, Assam Rifles chhuah hun atan Laldenga Centre leh pawimawh zual dangte an dah phawt thu a sawi a, "Kawng chhâwng chu a man a tam deuh avangin kan telh ngam rih lo," a ti a, Smart City hnuaiah hian Housing and Urban Affairs-in kawng chhâwng telh a phal thu a sawi.

Chief Minister sawi danin, Smart City bakah hian kawng chhâwng atan External Aided Project, Asian Development Bank leh World Bank aṭanga sum pûk ngaihtuahna a awm a ni.