Covid-19 vaccine pek kim dan tur sawiho

Lunglei DC Kulothungan A kaihhruaiin nimin khan a pisaah sorkar leh tlawmngai pawl hruaitute’n Lunglei district-a mite’n Covid-19 danna vaccine an lak vek dan tur an sawiho. Bawrhsap chuan, vaccine a tam thei ang ber pek a nih theih nan hmalakpui turin YMA leh kohhrante a sáwm.

Kulothungan A chuan, electoral roll-a mihring awm aṭanga chhûtin an district-ah mipui 93.2% hnenah vaccine pek a ni tawh tih a sawi a, “Kan him theihna ber chu vaccine lak kim a ni. 100% kan tlin theih nan thawhhona ṭha tak kan neih a ngai,” a ti.

Lunglei district-ah khua 168 a awm thu sawiin DC chuan, “Heng zinga khaw 54-te hi kalpawh a harsa a, a bik takin Bangladesh ramri hrula awmte an ni. Ramri hrûla awmte hnena vaccine pek kawngah medical team-te hi lawng emaw, motor emaw hmangin BSF-te’n lo pui ang che u,” a ti a; vaccine a tam thei ang ber pek a nih theih nan YMA leh kohhran hrang hrangte hma lakpui turin a sáwm a ni.

Dr Lalrinthangi tarlan danin, Lunglei district-a Covid-19 vaccine pek tur zat chu mi 1,04,897 an ni a, December 4, 2021 thleng khan dose khatna mi 97,723 (93.3%) leh dose hnihna mi 78,815 (80.7%) pek a ni tawh.

Ṭhutkhawmawh hian Lunglei additional DC Misael, Civil Hospital medical superintendent Dr Ngurchamliana, SDO(Sadar) C Lalduhzuali, BSF, Assam Rifles, YMA leh UNICEF aiawhte an tel a ni.