Mizoramah hripui vei enkawl lai Mi 2,790 (2.05%) chiah an awm

December 5, Pathianni khan Mizoramah Covid-19 vei mi 92 hmuh chhuah a ni. Nimin khan tlai dar 5 thlengin hripui vei dam tawh mi 310 chhuahtir an ni a, mi pakhat a thi a; hripui vei enkawl mek mi 2,790 an awm a, hripui vei tawh aṭangin 2.05% a ni.

Covid-19 vei Pathiannia hmuh tharte chu mipa 39 leh hmeichhia 53 an ni a; TrueNAT hmanga hmuh mi pahnih, RAT hmanga hmuh 89 leh FIA hmanga hmuh mi pakhat an ni. ZMC laboratory-ah swab sample endik a ni lo.

IDSP record angin, Mizoramah Covid-19 vei 1,36,454 hmuh chhuah a ni tawh a, mipa 65,877 leh hmeichhia 70,577 an ni a, mipa aiin hmeichhia 4,700-in an tam zawk. Nimin tlai dar 5 thleng khan mi 1,33,156 (97.58%) chhuahtir an ni tawh a, mi 508 (0.37%) thi tawhin, enkawl mek mi 2,790 (2.05%) an awm.

December 5, Pathiannia Covid-19 vei hmuh thar mi 92 zingah symptom nei mi 74 an awm a, mi 18 erawh chuan symptom an nei lo.

Pathiannia swab sample endikah positivity rate 10% chung lam district panga a awm a, positivity rate sànna ber Lawngtlai district-ah 100% a ni. Positivity rate 10% chung lam dangte chu - Saitual 35.71%, Serchhip 33.33%, Mamit 17.39% leh Champhai 11.27% a ni a; Siaha district-ah positive hmuh a ni lo a, Hnahthial district-ah sample endik a ni lo.

Mizorama swab sample endik tawh zawng zawngah RT-PCR hmanga endik zat percentage ni tin a tlahniam hret hret zel a, RAT hmanga endik zat a pung zel thung. December 5, 2021 thlenga swab sample endik tawh 14,46,611 aṭanga RT-PCR hmanga endik zat percentage chu 22.52 a ni a, RAT hmanga endik zat chu 71.57% a tling.

Kum 2011 chhiarpui aṭanga chhûtin, Mizorama Covid-19 vei hmuh tawh 1,36,454 chu mi 1,000 zelah hripui vei mi 124 an awm ang a ni a; mi 1,00,000 zela Covid-19 vangin mi 46 an thi tawh ang a ni tih sorkar thuchhuakin a tarlang.

Nimin khan tlai dar 5 thlengin hripui vei dam tawh mi 310 chhuahtir an ni a, Aizawl district-ah mi 107, Saitual district-ah 61, Kolasib district-ah 34, Lunglei leh Serchhip district-ah 31 ve ve, Champhai district-ah 20, Mamit district-ah 13, Hnahthial district-ah pasarih leh Lawngtlai district-ah paruk an chhuak a ni.