JAC-in ramri hrula Assam Forest hnuaia ramte enkawl tawh an phût

JAC on Inner Line Reserved Forest Demand (ILRFD) hruaitute chuan, nimin khan Aizawl Press Club-ah thuthar thehdarhtute an kâwm a; Mizoramin sq. miles 509 Inner Line Reserved Forest (ILRF) a enkawl theihna atan sorkar laipuiah dilna siam tura Mizoram sorkar an phût thu an puang.

JAC on ILRFD hruaitute chuan, sq.mile 509 ILRF chu Lushai Territory (Mizoram) chhunga awm a nih thu sawiin, "Khatih lai khan Forest department changtlung leh chak kan neih loh avangin Assam Forest-in an enkawl a ni. Mizoramin kan enkawl ve theihna atan central sorkarah a rang thei ang berin kan sorkar hian dilna siama thawn nghal turin kan phût a ni," an ti.

Assam-in sq. mile 509 ILRF chhung aṭanga chhiah lak Mizoram hnenah a pek ṭhin thu sawiin JAC on ILRFD hruaitute chuan, "Kum 1972 aṭangin min pe ta lo. Kan sorkar hian Assam sorkarah an leiba a pung nen lam dil nghal turin kan phût tlat a ni," an ti a, Mizoram sorkar chuan chhuanlam siam loin, dil ngei se an duh thu an sawi.

JAC on ILRFD hruaitute chuan, tun hnaia Mizoram leh Assam chief minister-te inbiaknaah sq.mile 509 chungchang sawi a awm a nih chuan Mizoram mipui hnenah a rang thei ang bera zêp awm loa puang turin chief minister Zoramthanga an phût tih an sawi bawk.