KHAWTHLIR

Synod Inkhawmpui
Synod Inkhawmpui vawi 98-na chu vawiin hian ṭan a ni dawn a, December 12, Pathianniah a ṭiak ang. Synod Inkhawmpui hi Republic Veng Bialin Republic Veng Kohhran biak-inah an thleng dawn a, vawiin hian Nomination Committee an ṭhu ang a, December 8-11 chhungin ro an rél ang a, Pathianni chawhma chu pastor nemngheh leh probationary pastor dahngheh inkhawm neih a ni ang. Inkhawmpuiah hian hripui leng vangin palai zat tihtlem a ni a, zan lamah vantlang Pathian biak inkhawm a awm dawn lo. Moderator tur chu Rev. Dr Vanlalnghaka Ralte a ni.

Zin report pe
Chief minister Zoramthanga chuan nimin khan MNF pisa, Mizo Hnam Rûnah tun hnaia sorkar laipui hotute a dawr dan a sawi a; Prime Minister leh Home Minister-te'n an lo ngaih pawimawh thu sawiin, kum thar lamah a hlawhtlinna an hmuh ngei a beisei thu a sawi.

Thisen pe
Synod Higher Secondary School NSS chuan nimin khan an sikulah thisen pek rûnpui an huaihawt a, Aizawl Civil Hospital tan thisen unit 108 an pe a, petute mipa 96 leh hmeichhia 12 an ni.

MEOU hruaitu
December 5, 2021-a Mizoram Earth Mover Owner's Union (MEOU) office bearer atan tlan chhuah mi 11-te chuan nimin khan nihna an insiamrem a, president-ah Lalmuansiamkima leh general secretary-ah R Lalliantluanga ruat an ni.

Kala Utsav 2021-22
Mizoram Samagra Shiksha-in State Level Kala Utsav 2021-22 a buatsaihah Lalṭhakima, Mamit High School zirlai chu Vocal Music Classical category-ah pakhatna a ni a, Mizoram aiawhin National Kala Utsav-ah a tel dawn.

Vote turin sáwm
Aizawl District Municipal Election officer Dr Lalhriatzuai Ralte, bawrhsap chuan nimin khan December 16, 2021-a local council by-election neih turah ngenna a tichhuak a; inthlanna neihna tur hmuna khawsa, kum 18 tling chinte chu vote thlak vek turin a sáwm.