Governor-in oil & gas company-te a kâwm

Governor Dr Hari Babu Kambhampati chuan nimin khan Raj Bhawan-ah Indian Oil Corporation Limited (IOC), Bharat Petroleum Corporation Limited leh Hindustan Petroleum Corporation Limited (HPCL) hotute a kâwm a, Mizorama tuialhthei leh eirawngbawlna gas dinhmun sawipuiin, eirawngbawlna gas sem ṭhin (point delivery) chu Aizawl leh district khawpuiah home delivery-a sem a nih theih nana hma la turin a chah.

Hari Babu Kambhampati chuan, Mizorama tuialhthei leh eirawngbawlna gas dinhmun te, oil company-te'n mipui mamawh an phuhru em tihte leh mipui mamawh pekna kawngah harsatna an tâwk em tih te, Ujjawala scheme thlen chin leh a kalpuina kawnga harsatna awm te, harsatna awmte chu engtia sutkian theih nge tihte hriat chian a duh vanga meeting hi ko a nih thu a sawi.

Oil company-te chu district hotute nen thawkhoin, mirethei tana gas connection pekna Pradhan Mantri Ujjwala Yojana (PMUJ) dawng theite chhinchhiah a, gas connection an neih vat thei nan chak zawka hma la turin Governor chuan a chah. Siahaa petrol pump pakhat chauh awmin mipui mamawh a phuhru tâwk lo nia a sawi chungchangah IOC hotute chuan, pump dang pakhat hawn belh thuai a nih dawn thu an sawi.

IOC hotute chuan, Mizorama tuialhthei leh eirawngbawlna gas phurh luh dan leh petrol pump dinhmun te, tuialhthei pawlh dal venna atan khawl hmanga an vil dan te, Mizorama eirawngbawlna gas phurh luh leh sem dan chungchang te, Mualkhang Gas Bottling Plant tilian tura hmalakna te, PMUJ an kalpui dan te an an sawi. HPCL aiawhte'n Mizorama an company-in hma a lak dante an tarlang bawk.

Inkawmnaah hian Food, Civil Supplies & Consumer Affairs (FCSCA) secretary Zothanmawia leh director Ramdinliani te pawh an tel a; FCSCA hotute chuan, eirawngbawlna gas sem dana local council leh village council-te nena an thawh dan chungchang leh eirawngbawlna gas tihchingpen venna kawnga hma an lak dante an sawi.

FCSCA department hotute chuan, gas semna hmuna a bûkna dah tura an tih angin IOC hotute'n an distributor-te chu point delivery an tihna hmunah cylinder bûk tling ngei consumer-te'n an dawn thei nan a bûkna dah ngei tura an hriattir tur thu an sawi bawk.

Inkawmnaa tarlan ṭhenkhat
 IOC-in Mizoramah fill­ing station 52 leh LPG distributor 60 an nei mek.
 IOC-in kum thum chhungin pump 30 dah belh an tum.
 IOC-in kum thum chhungin cheng vbc 180 vel sengin Mualkhang Gas Bottling Plant tihchangtlun an tum. Tihchangtlun hnuah kum 30 awm leh tur thlengin Mizoram mamawh a phuhrûk an beisei.
 Réla châwm tuialhthei dah khawlna hmun tur rail fed depot sak theihna tur ram an zawng mek.
 HPCL-in Mizoramah petrol pump pasarih an nei a, kum 2024 thlengin pump dang 32 hawn belh an tum.