MISA-in Annual Conference an hmang

Mizoram Information Service Association (MISA) chuan nimin khan Information & Public Relations auditorium-ah Annual Conference an hmang a, IPR minister Lalruatkima’n a hmanpui.

Minister Lalruatkima chuan, IPR department chu department ṭhenkhat anga thawktu tam leh lian ni lo mah se, department pawimawh an nihna hripui lêng donaa an ṭangkaina danah a lang chiang tih a sawi a, “Mipui rin ngam leh rintlak ni tura IPR department hmalakna a fakawm. Sorkar thuchhuak rintlak mipui hriata puan chhuahnaa mawhphurtu pawimawh tak an nih bakah, sorkar ruahmanna leh hmachhawp thar mipui zirtir hmasatu a nih avangin in hnathawh hian mipui rilru sûkthlêk thui tak a hril ṭhin,” a ti.

Khawvel changkanna ang zela intuai hriam tura chahin Minister chuan, “Mi dangte zirtirtu nih zel a pawimawh. IPR hi sorkar policy puanzar bakah, thuthar lak khawm chungchangahte mawh latu ber department a ni a, sorkar chêt velna zawng zawng hi kan hriat loh a thiang lo,” a ti a; Mizoram media kalphung ṭhat leh ṭhat loh thlenga mawhphurhna sang tak nei an nih thu a sawi.

Inkhawmpuia tarlan danin, MIS cadre post 48 a awm a, post 19 (39.5%) hnawh khah niin, post ruak 29 a awm.

MISA Annual Conference hi an vice president F Lalfakzuala’n a kaihruai a, patron Lallianpuii, IPR director-in thu a sawi bakah, business session neih a ni.