ADC-te’n lungawi lohna an lantir

Ram danpui siamṭhat vawi 125-na, 125th Constitution Amendment Bill, 2019 kalpui mekah, autonomous district council (ADC)-te’n thuneihna sang zawk an neih theihna tura rawtna sorkar laipuia an thlente dodal zawnga Mizoram sorkarin ngaihdan a thlen avangin nimin khan Lawngtlai leh Chawngte (Kamalanagar)-ahte lungawi lohna lantir a ni.

Lawngtlaiah chuan chhun dar 12-ah Lawngtlai district-a political party pathum - Congress, BJP leh ZPM-te huaihawtin lungawi lohna lantir a ni.

Lai DCC president J Ropianga Chinzah, BJP adiviser TT Nohmung, ZPM president MC Lalramchhana leh Lai DYCC president Laltlawmlova Chinzah ten thu an sawi a; hnam hnuaihnung zawkte’n dinhmun sang zawk an neihna tur kawng dâltu dodalnaa MNF party an tel lo chu mak an tih thu an sawi.

Chakma Autonomous District Council (CADC) huam chhunga political party leh tlawmngai páwl hrang hrangte pawhin Chawngte (Kamalanagar)-a CADC pisa bulah lungawi lohna an lantir a; BJP, Congress party, National People’s Party, Central YCA, Central Mizoram Chakma Students’ Union leh Chakma Mahila Samiti-te an tel.

Lungawi lohnate chu thuziak hmangin an tarlan bakah an aurual a; BJP MLA Dr BD Chakma, CDCC vice president Laxmi Bikash Chakma, NPP district president Doymoy Daveng Chakma leh Central MCSU general secretary Santosh Chakma ten thu an sawi.

Lawngtlai leh Chawngteah hian Mizoram sorkarin district council chungchanga sorkar laipuia ngaihdan a thlen copy an hâl a ni.