Krismas leh kum thar lawmna Ruai ṭheh tum ṭhahnem tak an awm

Kumin Krismas leh kum thar 2022 lawmna ruaiṭheh chungchangah kohhran hrang hrangte tih dan tur a inang lo a; Aizawl páwn lama kohhran ṭhahnem tak chuan ruai ṭheh an tum laiin, Aizawl khawpuia kohhran zingah ruai ṭheh tur an awm meuh lo.

Kumin December 1 leh nakkum January 15 inkara hman tur Covid-19 inkaihhruainaah Krismas leh kum thar lawmna ruaiṭheh chungchanga phal a nih thu emaw, phal loh thu emaw a awm lo a; tualchhung kohhrante'n an district-a inkaihhruaina thupek en chungin an kal dan tur an rél tlangpui.

Mizoram sorkarin November 30, 2021-a inkaihhruaina a tihchhuahah chuan, Krismas leh kum thar hmannaah Covid-19 a darh loh nan theihtawpa ṭan lâk lehzual a ngaih thu tarlan a ni.

Vanglaini palaiin tualchhung kohhran mite a biak pawh chinah Aizawl khawpuiah chuan Krismas leh kum thar lawm nan ruai an ṭheh dawn lo tlangpui a; chutih laiin, Zemabawk Presbyterian Kohhran chuan ruai ṭheh an tum thung.

Republic Vengthlang Presbyterian Kohhran pawhin ruai ṭheh an rel a, ran an zawng mek. Hri leng avanga ruai an ṭheh thei lo a nih chuan ruai sa (hmin sa) sem an tum a; UPC (Mizoram) tualchhung kohhran zingah ruai ṭheh tum an awm nual nia thu dawn a ni.

Aizawl khawpui páwn lamah chuan kohhran ṭhahnem takin ruai ṭheh an tum hlawm a, district khawpuiahte pawh ruai ṭheh tur eng emaw zat an awm a, ruai ṭheh tum lo kohhran an awm nual bawk. District khawpui ni lo, thingtlang khaw dangah chuan ruai ṭheh an tum tlangpui.

Vanglaini palaiin a biak zingah, Aizawl district-a Darlawn khuaa kohhran hrang hrangte chuan ruai an ṭheh dawn hlawm a; Phulpui khuaa kohhran pawl pathuma tualchhung kohhran palite'n ruai ṭheh an tum vek a, Chhimphei tlangdunga khaw hrang hrangah pawh ruai ṭheh an tum hlawm.

Lunglei khawpuiah kohhran ṭhenkhatin ruai ṭheh an tum a, chu'ng zingah chuan BCM Rahsi Veng Kohhran pawh a tel. Ruai ṭheh tum lo pawh an awm tho bawk.

Lunglei district-a Tlabung leh a chhehvela kohhran hrang hrangte'n ruai ṭheh an tum vek a, ruai ṭheh turin an inbuatsaih tawh tih Tlabung Post Editor chuan Vanglaini a hrilh a; Tlabung leh a chhehvelah Covid-19 vei an awm tawh rih loh thu a sawi a ni.

Siahaah pawh kohhran hrang hrangin ruai ṭheh an tum a; Evangelical Church of Maraland (ECM), Siaha New Colony Kohhran mite chuan sorkar aṭanga thu khauh tak a awm thar a nih loh chuan ṭheh an tum a, ran pawh an hmu tawh tih an sawi.

Champhai district-ah kohhrante’n ruai ṭheh an tum hlawm nia thu dawn a ni a; Champhai Tlangsam Presbyterian Kohhran chuan thawhlawm an khawn ṭan tawh a, Zawlsei Kohhran pawhin ran an nei tawh.
Kolasib district lamah pawh kohhran tam takin ruai ṭheh an tum a; Vairengtea kohhran hrang hrangin ruai an ṭheh dawn a, ṭheh tum lo an awm bawk. Kawnpuia journalist pakhat chuan an khuaa kohhrante’n ruai an ṭheh deuh vek dawn tih a sawi. North Chawnpuiah UPC (Mizoram) leh Presbyterian Kohhran an awm a, ruai ṭheh an tum ve ve.

Serchhip khawpuiah ruai ṭheh tum an awm rualin, ṭheh tum lo pawh an awm nia thu dawn a ni. Serchhip Chhimveng Kohhran chuan ruai ṭheh tumin, thawhlawm an khawn mek a; Leng Presbyterian Kohhran chuan veng pathumah inṭhenin Krismas ruai vawi hnih ṭheh an tum a, kum thar ruai erawh chu Krismas zawhah an ngaihtuah leh dawn.

Lawngtlai khawpuiah kohhran tam zawkin ruai ṭheh an tum a, chutih rualin, kohhran ṭhenkhat chuan zaikhawm loh an rél. Lawngtlai MJA president Lalngheta Ralte sawi danin, sorkarin inkaihhruaina a tihchhuahah ruaiṭheh chungchang chiang taka a tarlan loh avangin Lawngtlai district-a kohhran hrang hrangte’n Krismas lawm dan turah ruahmanna mumal an la siam thei lo tih sawiin, tualchhung kohhran ṭhenkhat chu ruai ṭheh turin an inbuatsaih tih a sawi.

Lalngheta Ralte chuan, kum dang angin Lawngtlai bazar a lûn lo a, Inrinniah pawh bazar a la tháwl a, dawrkaite pawhin kum dang angin bungrua an la tam lo tih a sawi bawk. Mamita kohhran ṭhenkhat chu ruai ṭheh tumin an inbuatsaih a, chutih rualin, kohhran tam tak chuan thutlukna nghet an la siam thei lo hlawm. West Phailengah chuan kohhrante’n ruai ṭheh an tum hlawm a ni.

Saitual leh a chhehvela khuate’n ruai ṭheh an tum hlawm nia thu dawn a ni a; Phullenah pawh ruai ṭheh an tum a ni. Khawzawl district-a Khawhaia kohhran hrang hrangte chu ruai ṭheh turin an inbuatsaih phawt a, hripui a darh nasa emaw, DC aṭanga phal lohna thu a chhuak emaw a nih erawh chuan ṭheh lo thei an ni bawk.

Hnahthial khawpuiah kohhrante’n ruai an ṭheh dawn leh dawn loh a la chiang lo tih MJA hruaitute’n an sawi a; chutih laiin, thingtlang lamah chuan ruai ṭheh an tum hlawm a, South Vanlaiphai leh Thingsaia kohhrante pawhin ruai ṭheh an tum nia thu dawn a ni.