ZPM Political Affairs Committee (PAC) chuan, MLA aṭanga bàn tâk ZPM Legislature Party leader ṭhin Lalduhoma chungchangah law court-a kal loa mipui court-a kal turin thutlukna an siam a, "Serchhip biala by-election a awm hunah ZPM aṭangin Pu Lalduhoma a ding ang," an ti.
ZPM hruaitute chuan nimin khan an pisaah thuthar thehdarhtute an kâwm a; ZPM vice president K Sapdanga chuan, Assembly Speaker-in Lalduhoma chu MLA aṭangin November 27, 2020 khan a bàn tih sawiin, "He thu hian amah thlangtu ZPM mipui leh Mizoram mipui, a bikin sorkar kalphung thar duhtute rilru a hliam na hle a ni," a ti a; MNF MLA-te'n Lalduhoma an hêkna thu chu kimchang taka an hmuh zel thu a sawi.
ZPM Vice President chuan, Lalduhoma an hêkna chu dan lama mithiamte nen uluk tak leh chipchiar taka an zir nghal zel thu sawiin, "Dan lam thiam kan biakràwnte zawng zawngin Pu Lalduhoma an hêkna thute hi law court-ah chuan thu tling a nih an rin loh thu an sawi zel. Pu Duhoma duh dan leh dan lama kan mithiamte duh dan chu law court-a kal a, an hêkna hi cho lêt a ni," a ti.
K Sapdanga chuan, Lalduhoma thlang tlingtu Serchhip bial mipui hnenah an ngaihdan thawhna tur ZPM toll free an siam thu sawiin, "ZPM mipui mai ni loin, Serchhip bial chhunga mipui pawhin ngaihdan an rawn thawh nasa. Chuti chuan, Pu Duhoma leh dan lam thiamte duh dan law court-a kal leh bial mipuite ngaihdan, mipui court-a kal chu PAC chuan ngun takin a ngaihtuah a ni," a ti.
Lalduhoma thubuai chu dan bawhchhiatna avanga inhremna ni loin, politics-a inbeihna liau liauah ZPM-in an pawm tih sawiin Sapdanga chuan, "Chuvangin, amah thlangtu mipui leh amah duhsaktu mipui rawtna chu zawm zawk ṭhain PAC chuan a ngai," a ti a; mipuite'n thutlukna an siam theih turin mipui hnena zualko an rêl tâk thu a sawi.
ZPM Vice President chuan, by-election a nih hunah Pathianin rem a tih chuan ZPM aiawhin Lalduhoma a din leh ngei tur thu a sawi a, "Mizoramah dikna (justice) zahawmzia puan chhuahna remchang a ni tih hria a, khawngaih vote lo pe ṭheuh turin ZPM chuan Serchhip bial mipui kan sáwm nghal a ni," a ti.
ZPM vice president dang Rev. Dr K Thanzauva chuan, Lalduhoma chunga thil thleng chu natural law kalh a nih thu sawiin, "He thil thleng hian Mizo mipui rilru a ti ná a ni. Biblical law-a hmangaihna dan a kalh; Kristian kan ni a, a theih chin chin zawm tur. Itsîkna, inhuatna leh inhêkna a awm ta mai hi mipui pawhin mak an ti a ni," a ti a; Lalduhoma chunga thil thleng chu Mizoram tan mualphona a nih thu a sawi.
Zawhna chhangin ZPM hruaitute chuan, Lalduhoma leh dan lam thiamte'n law court-a kal an duh tak zet thu an sawi a, "Law court-a kal ngei an duh a, an ngen nasa. Mahse, dan hmanga inbeihna ni lo, politics thila inbeihna ni ngeia kan hriat avangin mipui court-a kal turin thutlukna kan siam ta a ni," an ti.
ZPM hruaitute thusawi ṭhenkhat
• Lalduhoma leh dan lam thiamte'n law court-a kal ngei an duh.
• Sorkar kalphung duhtute rilru a hliam na hle.
• Dan hmanga inbeihna ni loin, politics-a inbeihnaah ZPM chuan a pawm.
• Mipui rawtna pawmin, mipui court-a kal turin thutlûkna siam a ni.
• Lalduhoma chunga thil thleng hian Biblical law a kalh.
• Dikna leh zahawmna puan chhuahna atan Lalduhoma vote turin Serchhip bial mipui kan sáwm.
