MJA-te leh TIPM hruaitute an inkâwm

Mizoram Journalists' Association (MJA) member-te leh Thangram Indigenous People's Movement (TIPM) hruaitute chu nimin khan MZP Pisapuiah an inkâwm a, MZP president B Vanlaltána'n a kaihruai.

TIPM president K Vana Chorei chuan, Thangram huam chhungah Zo hnahthlakte chenna khua 24 awm tih sawiin, "Thangramah hian kum 300 chuang lo khawsa tawh kan nih thu history-ah a lang a, Thangram luah hmasatu kan nih avangin a ram leilung fa dik tak kan ni," a ti a; Thangram chu sq.mile 180 chhunga awm a nih thu leh Assam sorkarin nasa takin a ensan a, chhungkaw harsa tak tak an awm thute a sawi.

K Vana Chorei chuan, ram dang awpna hnuaia awm an nin tawh avangin Thangram mipuite'n Mizoram hnuaia awm an duh tak zet tih a sawi a, "Mizoram sorkar hnuaia kan awm theih nan hma min lakpui turin MJA hotute leh Mizoram sorkar kan ngen a ni," a ti.TIPM hruaitute chuan, Mizorama an chàm chhungin sorkar hotu leh official-te dawnsawn danah te, pawl leh political party hrang hrangte an kawm kualnaah beiseina sang tak an neih avangin an lawm thu an sawi a; anmahni lo dawngsawngtu leh mikhualtu MZP hruaitute chungah thinlung taka an lawm thu an sawi bawk. TIPM leh MZP chuan, Assam sorkar awpna hnuaia awm mek sq.mile 180 chhunga chengte chu Mizoram sorkar enkawlna hnuaia an awm ngei theihna turin Prime Minister hnenah memorundum thehluh an tum a ni.

MJA president Zonunsanga Khiangte chuan, "Zo fate hi ramriin min la dáidang mah se, rorelna pakhat hnuaiah kan awm hun beisei tlat ila, rilru leh thlarauah inpawh deuh deuh ila, i inhre reng ang u," a ti.

Zonunsanga Khiangte chuan, "Khawvel hmun hrang hrangah Zo fate kan inzár pharh a, mi ṭhenkhat chuan Mizoram chhunga mi chauh hi Zo hnahthlak emaw kan ti niin a lang. Social media velah pawh Zo hnahthlak hre chiang lo thil post a awm palh a nih pawhin in rilru lo tina lo ula, insuih khâwm turin hma lam kan pan mek a, kan la insuih khâwm dawn a ni," a ti. MJA-in puih theihna a nei a nih chuan an inhuam reng thu a sawi bawk.