Lockdown puan tumna a awm rih lo

Health & Family Welfare minister Dr R Lalthangliana hoin nimin khan Secretariat conference hall-ah Covid-19 lêng chungchang thlirho a ni a; Minister chuan, tun dinhmunah chuan Mizoramah lockdown puan tumna a awm rih loh thu a sawi.

Ṭhutkhawmah hian Aizawl khawpuia lockdown puan hnua hripui vei an tlem dan sawiho a ni a, lockdown puanin awmzia a nei hleah an ngai. Tun hnaia lockdown puan leh tura thuthang awm chungchangah, "Kan inthlakthleng thut a, harsatna kan tâwk emaw, kan dinhmun a derthâwng viau a nih loh chuan lockdown tumna a awm lo," an ti.

Meeting-a tarlan danin, Ministry of Health & Family Welfare-in November 2, 2020-a Mizorama hripui vei hmuh chhuah tawh zat tur an chhût lâwk dan chuan, December 4, 2020-ah mi 4,363 an tling tawh tura chhût a ni. Chutih laiin, nimin thleng khan Mizoramah Covid-19 positive mi 3,888 hmuh chhuah a ni tawh.

Covid-19 darh zel tur vèn nan Aizawl khawpui chhung hmun hrang hrangah awlsam zawka swab sample endik theihna tur mobile testing centre 'kiosk' siam turah Bawngkawn South Cultural Centre leh Chawlhhmuna Junior Cooperative Society Training Centre chu hman theih tura peih a ni a; sorkarin notification a chhuah veleh hman ṭan theih turin engkim tihfel a ni tawh. 

Kiosk dah nan Aizawl chhim lamah hmun laili pakhat an hual chu a remchan loh avangin hmun remchang dang dap mek a ni. Kiosks-a sample endikna man - RT-PCR, TrueNAT-PCR leh RAT rate chu India ram khawpui danga a man nen khaikhinin, mipui tana phurrit lutuk ni lo tura ruahman a nih thu an sawi.

Covid-19 Medical Operational Team, Indian Medical Association leh Mizoram Government Doctors' Association ṭangkawpin Dawrpui huam chhung an zir chianna report an tarlang. Report-a a lan danin, mipui mimir veivâk leh dawrkaite'n mask an vuah ṭha a, dawrkaite'n Sûlhnu mobile appli­cation QR code an tàr bakah, dawrtute chhinchhiahna tur register an dah hlawm. Dawr kawta ṭhu/inphote erawh chuan an ti lo tlangpui.

Bazarpui building - sa zawrhna leh thlai, ei chawp zawrhnaah Sûlhnu application leh register dah hian zawm a hlawh ṭha lo. A ṭul angin a hmun enkawltu department lamah thlen a ṭul tih a ni. Ṭhutkhawmah hian Home minis­ter Lalchamliana, Covid-19 Medical Operation Team chairman Dr ZR Thiamsanga, chief secretary Lalnunmawia Chuaungo, Mizoram Kohhran Hruaitute Committee, Joint NGO Coordination Committee leh Indian Medical Association aiawhte an tel a ni.