Bomb hmanga lui sangha mantu MLA ṭawngṭaipui turin mipui ngen

ZPM Ṭhalai chuan thuchhuah siamin, Lalduhoma hêk leh MLA aṭanga paih a nih hnua thil thlengah Pathianin a tâwk têin ro a rêla an hriat thu an tarlang a; Mamit bialtu MLA H Lalzirliana chu bomb hmanga sangha an man avangin ṭawngṭaipui turin mipui an ngen.

ZPM ṭhalaite chuan, MLA aṭanga Lalduhoma paih a nih hnuah, amah héktute zinga mi H Lalzirliana, Mamit bialtu MLA chuan Phaizau khawtlangin lui an humhalh lai bomb hmangin an bei tih sawiin, "Amah vanga Phaizau mipui rilru na takin an awm mek a, bialtu MLA berin a bial chhung ngeiah dan bawhchhiain mualpho takin a awm mek. Pathian thuin, 'Dik lo taka inthurualte chu tihmualpho lohin an awm lo ang,' a tih chu a thlen dik theih nan Pathianin a tâwk têin ro a rel niin kan hria," an ti.

MLA H Lalzirliana ten insawi fihlîm tum mah se, bomb hmangin sangha an man ngei tih khawtlang hruaitute'n an puang tih sawiin ZPM Ṭhalai chuan, "Zêp rual lohin an thlalak nen lam Zoram hmun tinah a darh chum chum a, hetianga a chê pawh hi a aikaih ni ngeiin kan hria. MLA meuhin sangha a bomb hi kan dem rualin, kan khawngaih," an ti a; dik lo taka mi dang a hêk tawhnaah inhmuhchhuah nan leh inchhir phah nan a hman theih nan an ṭawngṭaisak tih an sawi. ZPM ṭhalaite chuan, ZPM ṭhalaite chu Pathianah innghat tlat tur leh phuba lâk duhna rilru pu lo turin an chah a ni.