COVID-19: MIZORAM DINHMUN Hripui vei mi 7 hmuh belh a ni
December 3, Ningani khan Mizoramah Covid-19 vei mi pasarih hmuh chhuah a ni a, nimin khan mi 35 chhuahtir an ni thung. ZMC laboratory-ah hripui vei hmuh chhuah a ni lo a, ni 50 hnua swab test an neih nía Covid-19 positive hmuh chhuah an awm loh lehna hmasa ber a ni.
Covid-19 vei hmuh chhuah thar pasarihte chu mipa paruk leh hmeichhia pakhat an ni a, TrueNAT-PCR hmanga hmuh mi pathum leh Rapid Antigen Test (RAT) hmanga hmuh mi pali an ni. An vai hian Mizoram chhunga hri kái vek an ni a; Aizawl district-a mi an tel lo.
Nimin khan hripui laka fihlîm tawh mi 35 chhuahtir an ni a; Aizawl bikah ITI CCC aṭangin mi pasarih, Beraw CCC aṭangin pathum, Zokhawsang aṭangin pahnih an chhuak a, Lawngtlaiah mi 18, Serchhipah pathum leh CIJWS Vairengte-ah mi pahnih an chhuak bawk.
Mizoramah Covid-19 positive mi 3,888 hmuh chhuah a ni tawh a, mipa 2,868 leh hmeichhia 1,020 an ni. Nimin tlai dar 5 thleng khan mi 3,682 (94.70%) chhuahtir an ni tawh a, mi paruk (0.15%) thi tawhin, enkawl mek mi 200 (5.14%) an awm.
Mizorama Covid-19 positive hmuh chhuah tawh mi 3,881 zinga mi 1,827 chu Mizoram chhunga kái an ni a, mi 2,061 chu state páwn aṭanga rawn lût an ni. December 3, Ningani khan Mizoramah swab sample 977 endik a ni a, ZMC-ah mi 349, TrueNAT-PCR hmangin district pasarihah mi 129 leh RAT hmangin district 11-ah mi 499 endik a ni. Mi 977 zingah Covid-19 positive mi pasarih an awm a, natna (symptom) lang chhuak pakhat a awm.
Sorkar thuchhuah tarlan danin, TrueNAT-PCR hmanga Covid-19 positive hmuh chhuah zinga pahnih chu Champhai District Hospital-a hmuh, Champhai Bethel Venga mipa naupang kum 8 leh 10 an ni a, tualchhunga kái niin, symptom an nei lo. Lawngtlai District Hospital-ah Border Roads Organisation (BRO) mi pakhat, mipa kum 40 mi hmuh chhuah a ni bawk a; Mizoram chhunga kái, symptom nei lo a ni.
RAT hmanga hmuh chhuah palite chu mipa pathum leh hmeichhia pakhat, kum 18-45 inkar an ni a; tualchhunga kái vek an ni tih sorkar thuchhuahin a tarlang.
RAT-a hmuh zinga pakhat chu Lunglei Theiriata hmeichhia kum 19 mi a ni a, nursing course zir tum, interview a neih dawn vanga endik a ni. Hri a kàina hriat a ni lo. RAT hmanga hmuh mi pathum dang chu Lawngtlaia hmuh chhuah, Paithar khuaa mipa kum 18, 25 & 45 an ni a, an kai ṭanna hriat vek niin, an zinga pakhat chu symptom nei a ni.