Mamit College-a RUSA hmalakna sawiho

Rashtriya Uchchatar Shiksha Abhiyan (RUSA) Mamit College Board of Governors chu nimin khan an chairman Dr Lalrozama, district bawrhsap hoin an ṭhukhawm a, RUSA hnuaia hmalakna an thlirho.

Dr Lalrozama chuan, Mamit College-in RUSA kaltlangin hmasawnna a hmu tih sawiin, "Zirlaite leh thawktute'n model degree college-a hlàn kài a nih theih nan cheng tam tak sênga hmasawnna hna thawhte hi chhawr ṭangkai thiam a ngai," a ti. Zirna chu vantlanga mi pawimawh leh chhawr tlak chher chhuaktu pawimawh ber a nih avangin ṭhahnemngai leh taima taka thawk zel turin thawktute a chah.

Ṭhutkhawma tarlan danin, Mamit College-ah hian RUSA 2.0 kalpui mek a ni a, component paruk hnuaiah degree college awm sa chu model degree college-a hlàn kai a nih theih nan cheng nuai 400 ruahman a ni. RUSA hnuaiah hian cheng nuai 160 man library cum seminar hall (395.18 sq.m), classroom building (482 sq.m) cheng nuai 153 man leh, boundary wall (52 meter) Rs. 7,00,000 mante thawh zawh a ni tawh a; bungraw thar leh thil ṭul dang leina tur sum la dawn loh nuai 80 a awm.

Mamit College RMSA BoG-ah hian DC chu chairman niin, College principal chu vice chairman a ni a; member-ah Mamit YMA Sub-Hqrs, MHIP leh college aiawhte awmin, member secretary chu RUSA coordinator a ni.