January 9, 2015 zana Sangliansiama, Republic Vengte chhungkuaa mi panga thattu Laltlanchhuaha, Republic Veng chu Court-in puh a nihna zawng zawngah thiam loh a chantir a, November 5, Ningani hian hrem dan tur Court-in a puang dawn. Court thutlukna ngaichângin Republic Veng khawtlang hruaitute chu nimin khan Court-ah an kal khawm.
Laltlanchhuaha thubuai hi Aizawl additional district & sessions judge Dr HTC Lalrinchhana'n a ngaihtuah a, nimin khan thutlukna a puang a, thiam loh a chantir. Hetih lai hian, Laltlanchhuaha hrem a nih dan tur erawh chu November 5, 2020-ah a puang dawn thung.
Sangliansiama chhungte ukil hnen aṭanga Vanglaini thu dawn danin, Laltlanchhuaha chu mi panga thatah te, mi thah tumahte leh mi that tura mi ina lutahte puh a ni a; chu'ng thubuaiah chuan thiam loh chantir vek a ni. Laltlanchhuaha hi dam chhung tàntir emaw, thi tura tih (death sentence/capital punishment) hmanga hrem tur a ni.
Court chuan Laltlanchhuaha chuan rûi lo hai lo leh rilru lama buaina nei loin, tum rêng vangin tual a thatah a ngai. Laltlanchhuaha'n tual a thah chhana sawi, Sangliansiama te chhungkuain pawisa an bá anga a sawi pawh thu dik a ni lo tih a finfiah.
Laltlanchhuaha hi mi panga a thah avangin IPC Section 302 (tualthah), IPC Section 307 (tualthah tum) - Sangliansiama te awmpui thah a tum vang (bathroom-ah a inkalh khum avangin a him) leh, IPC Section 449 - tualthah tuma mi ina a luh thubuaiahte thiam loh chantir a ni.
IPC 302 leh 449 hmanga thiam loh chantirte chu dam chhunga lung-in tàn emaw, thi tur emawa hrem tur an ni a; IPC 307 chu dam chhung tàn emaw, kum 10 jail táng tura hrem tur a ni thung.
Court judgement order-a tarlan danin, Laltlanchhuaha hi January 9, 2015 zan dar 7:30-ah Sangliansiama (57) s/o. Chalneihthianga (L)-te inah a lut a, Sangliansiama chu pawisa dilin, Rs. 1,000 a lo pe a ni. Laltlanchhuaha chuan pawisa a dil belh a, Sangliansiama chuan a remtih loh avangin Laltlanchhuaha chuan Sangliansiama chu a chemtein a vit nghal a ni.
Sangliansiama nau Vanlalchhungi (54) au chunga páwna tlân chhuah tum chu hnûk lutin, a vit leh a, kawngkapui chu in chhung lamah a kalh nghal. Sangliansiama nupui Khualthangi (57) mut pindan lama tlân lut chu ûm zuiin a vit a; chumi hnuah an fapa Isaac Lalrinnunga (5) leh Sangliansiama te nau Samuel Lalrinchhana (14)-te a vit leh a ni.
Sangliansiama, Khualthangi, Vanlalchhungi leh Samuel Lalrinchhana te chu inah an thi nghal a, Isaac Lalrinnunga chu damdawi-in panpui a nih laiin a thi. Sangliansiamate awmpui nula erawh chu bual pindanah a inkalh hnan hman avangin a him a ni.
