Covid-19 vei hmuh thar 35 zingah Mizoram chhunga kái 31 an awm
November 2, Thawhṭannia Mizorama Covid-19 vei hmuh chhuah mi 35 zingah Mizoram chhunga kái mi 31 an awm a, Covid-19 natna lang chhuak (symptom lang) mi 18 an awm.
Sorkar thuchhuah aṭanga a lan danin, hripui vei hmuh thar, tualchhunga kái mi 31-te chu Aizawla veng 10 leh Aizawl páwn lama khaw pahnih - Falkawn leh Champhaia mite an ni a; an zinga mi 14-te chu an kai ṭanna hriat a ni lo.
Aizawla Dinthar vengah Covid-19 positive mi 18 hmuh chhuah thar a ni a; ZMC laboratory-a hmuh chhuah mi 10 leh RAT hmanga hmuh chhuah mi pariat an ni. An zinga pakua chu an kai ṭanna hriat a ni lo a; Covid-19 symptom nei mi 10 an awm bawk.