Intiaz Ali ruang Lailapur thlenpui

Vairengte Kawngthar Veng Branch YMA duty-te'n Mizorama ruihhlo tawlhrûk tum an man, November 2, Thawhṭannia thi Intiaz Ali (48), Lailapur ruang chu nimin chawhma dar 10:30 vel khan Lailapur thlenpui a ni a, an chhungte hnenah hlan a ni.

Intiaz Ali ruang hi Vairengte SDPO Ramtharnghaka hoin Vairengte auto-rickshaw stand thlanga IR police duty-na bul thlengin kalpui a ni a, Cachar Additional SP hoin Lailapur mi leh sate'n an lo la chhâwng a ni. He thil thleng avang hian buaina chhuak a awm hriat a ni lo a, Lailapur mipui erawhin an huam chhungah lungawi lohna an lantir.

Tarlan tawh angin, Intiaz Ali hi Vairengte Kawngthar Veng Branch YMA chuan mi dang hnena ruihhlo a pe chhâwng tur ramhnuaiah an man a, a tlanchhiatna lamah a hliam. Excise & Narcotics department hnena an hlan hnuah a damloh avangin Vairengte damdawi-in panpui a ni a, damdawi-inah a thi a, Septicemia vanga thi nia ngaih a ni.