Covid-19: Mizoram dinhmun Hripui vei mi 35 hmuh belh

November 2, Thawh­ṭanni khan Mizoramah Covid-19 vei mi 35 hmuh chhuah a ni. nimin khan mi 30 chuang chhuahtir an ni thung.

Mizoramah Covid-19 positive mi 2,792 hmuh chhuah a ni tawh a, mipa 2,148 leh hmeichhia 644 an ni. SRH-ZMC Bulletin tarlan danin, mi 2,792 zinga mi 2,386 (85.46%) chhuahtir an ni tawh a, mi pakhat (0.03%) thi tawhin, enkawl mek mi 405 (14.51%) an awm.

Covid-19 positive Thawhṭannia hmuh chhuahte chu mipa 15 leh hmeichhia 20 an ni a; ZMC laboratory-a hmuh mi 16, TrueNAT-PCR hmanga Champhai leh Saitual damdawi-ina hmuh mi pahnih leh, Rapid Antigen Test (RAT) hmanga Aizawl leh Lengpuia hmuh chhuah mi 17 an ni.

Nimin khan Mizorama hripui laka fihlim tawh mi eng emaw zat chhuahtir an ni a, SRH-ZMC Bulletin tarlan zat leh IPR thuchhuah tarlan zat erawh a inang lo (tlai dar 5 thlengin). SRH-ZMC Bulletin tarlan danin, SRH-ZMC aṭangin mi 12, Gilead Special School CCC aṭangin 15, MLA Hostel aṭangin pahnih leh, BSUP leh Lunglei Sazaikawn CCC aṭangin pakhat ve ve an chhuak. Chhuak zingah hian MLA Dr Vanlalṭanpuia leh a fapa an tel.

IPR lamin ZMC aṭangin mi paruk chhuak angin an tarlang a, SRH-ZMC Bulletin tarlan loh - Thenzawl leh Chhiahtlang CCC aṭangin pakhat ve ve leh Khawzawl aṭangin pahnih chhuak anga tarlan a ni. SRH-ZMC Bulletin leh IPR tarlante lâk kawpin, nimina chhuak zat chu mi 35 an ni.

November 2, Thawhṭanni khan ZMC laboratory-ah mi 1,339, TrueNAT-PCR hmangin district pariatah mi 93 leh RAT hmangin district 10-ah mi 483-te swab sample endik a ni a, a vaiin sample 1,915 a ni.

ZMC laboratory-ah RT-PCR hmangin Covid-19 vei mi 16, mipa leh hmeichhia pariat ve ve hmuh chhuah a ni a, Falkawna mi pakhat tih loh chu Aizawl khawpui chhunga mi vek an ni.

Sorkar thuchhuah tarlan danin, Falkawna mi hi mipa kum 22, state páwn lam mi, ZMC-a labour a ni a, a kaina chhui mek niin, symptom a nei lo. Mi dang zawng chu Aizawl tualchhunga kái an ni a, an dinhmun kimchang chu hmun dangah tarlan a ni.

TrueNAT-PCR hmangin Champhai District Hospital-ah Champhai Bethel Venga mipa kum 31-in hripui a vei tih hmuh chhuah a ni a, October 25, 2020-a Manipur aṭangin a rawn haw a, symptom a nei lo.

Bethel Veng VTF tarlan danin, an veng pa hi Assam Rifle Multispeciality Hospital, Manipur-a endiknaah September 19-ah Covid-19 positive a ni tih hmuh a ni a, October 5-a test-ah pawh a la positive. October 12-a test-ah a negative avangin damdawi-in aṭangin chhuahtir a ni a; October 23-ah Champhai pana a haw kawngah Ngopa-ah RAT hmanga endik niin, a negative leh avangin Bethel Veng VTF chuan home quarantine tura haw an phalsak. November 2-a endik lehnaah a positive leh ta a ni.

Saitual Hospital-a sample endik zingah Jharkhand lam mi, NIDHI company hnuaia thawk mipa kum 38 chuan hripui a vei tih hmuh a ni bawk a, symptom a nei lo.

RAT hmangin Covid-19 positive mi 17, mipa panga leh hmeichhia  12, Aizawl district-a awm vek hmuh chhuah a ni a; an zinga mi 14 chu Mizoram chhunga kái niin, mi pathum chu state páwn aṭanga rawn lût hlim an ni thung.

State páwn aṭanga rawn lut hlim, hripui vei hmuh chhuahte chu - Chanmari-a hmeichhia kum 39, Chawnpui venga hmeichhia kum 44 leh Sumsuih khuaa mipa kum 22 mi an ni a; an vai hian Kolkata aṭanga thlawhtheihna hmanga rawn haw, Lengpui Airport screening point-a RAT hmanga lo endik, symptom nei lo vek an ni.

Mizoram chhunga káite dinhmun kimchang chu hmun dangah tarlan a ni.