Sorkarin lockdown pawhsei a hreh - Health Minister

Health minister Dr R Lalthangliana chuan Aizawl Municipal Corporation (AMC) huam chhungah sorkarin lockdown pawhsei a hreh takzet thu a sawi.

Nimina Secretariat conference hall-a meeting-ah Dr R Lalthangliana chuan lockdown pawhsei hreh hle mah se, zau zawka thlirin nunna a hlu ber tih sawiin, "Bengsika ngaihtuah chung leh zau taka inrawn chungin lockdown hi pawhsei a ni. Tawngpawng puang ngawt kan ni lo a ni tih mipuiten min hriatsak se ka duh," a ti a, lockdown pawhsei avanga eizawnna kawnga harsatna tawk zawng zawngte ngaihdamna a dil.

Health Minister chuan lockdown pawhsei loh chuan harsatna lian zawk tawk thei dinhmunah kan din thu sawiin, "Nunna kan ngai pawimawh ber lo thei loa, hemi atana a man kan pek ve a ṭul rih si a ni. Kan dinhmun thlir chung zela kan that tlanna tur ber ni a kan hriat hi min zawm sak hram hram ang che u," tiin mipuite a ngen.