Aizawl inkhârkhip vanga harsatna tâwkte ṭanpui turin sorkar phût

Mizoram Pradesh Youth Congress Committee (MPYCC) chuan nimin khan thuchhuah siamin, Mizoram sorkar chu Covid-19 avanga AMC area-ah inkhàrkhip kalpui leh a nih avangin, mi harsa zawkte ṭanpui nan hma la turin an phût tih an tarlang.

MPYCC chuan, Mizoram sorkarin inkhârkhip a puan avanga harsatna tâwkte tan chhawmdawlna 'scheme' a la ngaihtuah lo chu pawi an tih thu sawiin, "Ni tin ei chawp zawng, sumdawng, lirtheia eizawngte chaw bél inkharkhip kaltlangin leih buaksak an ni ṭhin a, inkharkhip puan a nih hmain an harsatnate leh an ngaihdan sorkar hian la ve ṭhin rawh se," an ti.

Inkhàrkhip vanga eizawnna tàwp mek leh chhuanchhamte tana zángnadawmna tur siam chu local task force-te tih tura dah ngawt loin, sorkar chu a rang lama ruahmanna siam turin an phût a ni.

Mizoram sorkarin a ngaihna a hriat loh avang leh a inthlahdah avangin Covid-19 a hluar zel nia sawiin MPYCC chuan, "A hun loah LC/VC min inthlantir a, a hun loah vêk sikul kàitir an nih avangin chawlhkar hnih lai AMC area chu 'inkharkhip' leh a ni. Hei vanga mipui harsa zawkte harsatna sukiang turin sorkar hi hma la nghal turin kan phût a ni," an ti a; Covid-19 a hluar chhanah sorkarin mipui a puh ṭhin chu sim tawh se an duh thu an sawi.

Congress ṭhalaite chuan, Mizoram mipuite chu mahni tâwkah fimkhur ṭheuh tur leh Pathian khawngaihna díl chunga Covid-19 umbo tura ṭan la zel turin an sâwm bawk.