Covid-19 vei vanga enkawltu nei lo naupang enkawl dan tur ngaihtuah

Health minister Dr R Lalthangliana hoin nimin khan Secretariat conference hall-ah naupang, an chhungte'n Covid-19 an vei vanga enkawltu mumal nei lote buaipuia enkawl dan tur ngaihtuah a ni.

Health Minister chuan, Covid-19 chungchangah ngaihtuahna sèn kim a har tih sawiin, "Vawiina ṭha deuha kan hriat hi rei lo têah siamṭhat ngai a awm leh ṭhin. Thil thar, kan ngaihtuahnaa awm phâk lote a rawn lang leh nawlh ṭhin bawk a, kan ṭhatpui dan tur ngaihtuah chungin theihtawp kan chhuah a ni," a ti.

Meeting-a tarlan danin, Covid-19 positive puitling, CCC/DCH-a dah ngai, an fate positive ve si lo, in lama enkawltu nei lo eng emaw zat an awm. Positive zingah an fate CCC/DCH-a luhpui lo thei lo an awm nual a, naupang zinga negative chunga CCC-a lut ve zingah CCC-a an luh hnua Covid-19 positive ta an awm.

Tun dinhmunah CCC hrang hrangah naupang pasarih, anmahni enkawltu berte an positive avanga loh theih loh a dah luh an awm. Chu'ng naupang zinga upa ber chu kum 13 a ni a, mi dang zawng chu kum 10 hnuai lam an ni.

Nu, nau pawm lai Covid-19 positive, an fa sén kalsan rem si lo te, chhungkaw member positive vek, nausen kum 2 mi chiah negative, kalsan theih si loh pawh a awm a; chutiang kaihhnawih case hrang hrang a awm bawk.

An chhungte nen ṭap chunga inthlah loa lungawi taka an inthlah theih a ṭul thu meeting-ah hian sawi a ni a, "Anmahni enkawlna bik hmun buatsaih a, ei leh in thlenga nutrition mumal tak an dawn theih a ṭul. Covid-19 positive zingah nu nau pawm, hnute hne lai chuan an hruai thei a, hnute pek dan tur pawh mumal taka ruahman a ni," an ti.

Meeting chuan, a rang lama Standard Operating Procedure (SOP) siam tur committee an din nghal a, ni hnih chhunga report thehlut tura tih an ni.