MDC-te pisa kai tur dan tumtu Lawngtlai MNF ṭhalaite an man
Lawngtlai District MNF Ṭhalai leh Women Front-te chuan LADC-a sorkarna chelh mektu BJP MDC-te pisa kai tur chu nimin khan an dang a, pisa kai tur dangtu MNF ṭhalai mi 12 chu police-in man.
Lawngtlai MNF-te hian Thawhṭanni khan MDC-te pisa kái tur an dang tawh a, niminah an dang chhunzawm leh a ni. Hei vang hian Lawngtlai DC chuan November 2 khan Lawngtlai khawpui chhungah Cr.PC Section 144 tlawhchhanin mi panga aia tam awm khawm khap a nih thu a puang. Thupek an bawhchhiat avangin MNF ṭhalai hruaitute chu man an ni a, PR bond an ziah hnuah chhuahtir an ni.
Lawngtlai MNF ṭhalai president Elvis Lalthangzuala chuan, LADC-ah dik taka rorelna kalpui a nih theihna turin hma an la nia sawiin, "Democracy palzût a, majority pawh nei lo BJP MDC pakuate Governor PS Sreendharan Pillai hian a la hum tlat hi a mak kan ti a. Governor hi autonomous district council enkawl tur hian a tlak lo tak zet a ni," a ti.
Lawngtlai MNF tarlan danin, tunah hian MNF MDC 12, BJP MDC 9, Congress MDC 6 leh independent MDC pakhat an awm mek a; BJP-in majority nei loin sorkarna an kalpui mekah an ngai a ni.