Lalduhoma leh amah hêktu MLA-te Assembly Speaker hmaah an inlan Thutlukna siam vat theih a ni lo - Speaker

ZPM Legislature Party leader Lalduhoma, MLA aṭanga bàn a nih theihna atana hêktu MLA-te leh Lalduhoma chu nimin khan Assembly Secretariat conference hall-ah speaker Lalrinliana Sailo hmaah an inlan a, sawi duh an neihte an sawi.

Thuthar thehdarhtute zawhna chhángin speaker Lalrinliana Sailo chuan, Lalduhoma leh amah hektute a huhoa a kawm thu a sawi a, "Tun maia thutlukna siam tur a ni lo. An thusawi zawng zawng record vek a ni a, chu'ngte chu hmanhmawh loin ka zir chiang leh dawn. Kei chuan Speaker thuneihna lam ni loin, dan chiah ka thlír dawn a, dan hnuaiah vek thil ka ti ang," a ti.

Lalrinliana Sailo chuan, Lalduhoma chungchangah thutlukna siam hmanhmawh theih a nih loh thu sawiin, "Mithiamte ka ráwn a, ka la ráwn zel ang. Dan ang thlapa kal ka duh," a ti a; state danga thil thleng tawhte pawh a zir chian zel thu a sawi.

Lalduhoma pawhin thuthar thehdarhtute zawhna chhángin, thil thar vak a awm loh thu a sawi a, "Min héktute'n min hèk chhan an sawi nawn a, keiin ka ṭan chhan ka sawi ve leh a ni. Anti Defection Act chu a hming ang hi a ni a, mahni thlang tlingtute phatsantute hremna dan a ni. Kei chu ZPM thlan tlin ka ni a, ka phatsan lo a lawm," a ti.

'A ZPM lutuk' tia hèk a nih thu sawiin ZLP Leader chuan, "Kan ṭang tlang ni ta berin ka hria a, lawmthu ka hrilh let duh hial zawk," a ti a; ziak leh ṭawngkaa ZPM-ah rinawm tura a intiam angin rinawm taka a awm thu a sawi.

Assembly Speaker thutlukna ang ang a pawm dawn leh dawn loh zawhna chhangin Lalduhoma chuan, "A lungawithlak leh kan lungawi ang a, a lungawithlak loh chuan tih dan dangte pawh kan la zawng ve ang chu," a ti.

MNF MLA 10-te chuan Lalduhoma'n Constitution 10th Schedule Para 2(2) a bawhchhia nia ngaiin September 21, 2020 khan MLA aṭanga bàntir tura ngenna/hêkna Speaker hnenah an thlen a; September 24-ah MNF MLA dang pahnihin an thehlut ve leh bawk.