KHAWTHLIR

November 2, Thawhṭanni khan Home secretary Lalbiaksangi chuan Vairengte khuaa Intiaz Ali, Lailapur khaw mi thih chungchangah Assam Home Secretary a bia a, WT message a thawn bawk. Assam Home Secretary chu Assam state-a Mizote himna tura hma la turin a ngen a, state pahnih inkarah boruak ṭha lo a thlen lohna turin thil ṭulte a sawipui bawk.

Nimin khan Siaha khawpuia children's home hrang hrang leh District Child Protection Unit, Siaha ṭangkawp chuan Covid-19 donaa hma latu Health department, Police leh District Task Force-te hnenah an hmalakna avanga lawmthu sawi nan naupangte thuziak chi hrang hrang an hlân. Thilpek hlannaah hian DCPU-a thawk te, Siaha Observation Home, Orphanage Boys Home, Grace Children Home leh Siaha Child Adoption Centre-a thawkte an tel.

Assam aṭanga Mizorama lut tur lirthei, ramri buai vanga Lailapur-a dan chu la chhunzawm zel a ni a, Mizoram aṭanga Assam lam pan tur lirtheite pawh Zoram Driver's Union (ZDU) bultumin Vairengte dáiah la dan zel a ni bawk. ZDU chuan, Union Home Secretary hoa state pahnih chief secretary-te inbiakna thu zâwma lirthei an dante an chhuah hnuah Lailapur lamin an chhuah duh loh avangin, Lailapur lamin an chhuah hma chu chhuah bik an tum tawh lo tih an sawi.

State Referral Hospital-ah Covid-19 vei mi 76 enkawl mek an ni a, an zinga pahnih chu nimina dah luh an ni. SRH-ZMC Bulletin tarlan danin, mi 76 zinga paruk chu ICU-ah enkawl an ni a, mi dang zawng Isolation ward-ah an awm. ICU-a awm zinga pathum chu ventilator hmantir an ni a, pathum dang pawh oxygen pek mek an ni. Ward-a awm zingah ngaihtuahawm an awm lo.

Republic Veng Joint Action Committee (JAC) chuan thuchhuah siamin, an veng mi Sangliansiama te chhungkuaa mi panga thattu Laltlanchhuaha thiam loh chantir a ni chu lawmawm an tih thu an tarlang a, ""Hremna pawh a na thei ang bera lekkawh ngei kan beiseiin, kan phût. Court thutlukna hian chhiat tâwk chhungte rilru damna a pek kan beisei," an ti.