March 18, 2019-a Assembly session-a pass tawh, khua leh tui dik takte chhinchhiahna tur, 'The Mizoram Maintenance of Household Registers Bill, 2019' chu governor Jagdish Mukhi chuan a la pawmpui lo a, pawmpuina (assent) pek dawn leh dawn loh pawh hriat a ni lo.
Bill neitu General Administration Department (GAD) hotute chuan, Bill hi Governor-in a pawm dawn leh dawn loh an hriat loh thu Vanglaini palai zawhna chhangin an sawi a, "Zir chian a duh thu a sawi angin a zir chiang mekah kan ngai. Keini tan chuan lo zawh chhen chi a ni lo. Ama lam aṭangin thu dawn kan la nei lo a, kan nghak tawp a ni," an ti.
Governor Secretariat aṭanga thu an dawn danin, Bill chungchangah hian Governor chuan dan lama mithiamte a ráwn mek a, a pawm dawn leh pawm dawn loh chungchangah hriat an nei lo. Hetih lai hian, Governor Jagdish Mukhi chuan, The Mizoram Maintenance of Household Registers Bill, 2019 a la pawm loh chungchangah hian sawi tur a neih loh thu, Raj Bhavan-a officer-te kaltlangin Vanglaini palai a lo hrilh tawh. Governor-in a la pawmpui loh avang hian he dan duan thar hi hman theih a la ni lo.
Assembly House-a Bill put luh a nih ṭum hian GAD changtu chief minister Zoramthanga chuan, ṭhenawm ram aṭanga Mizorama dan loa lo lutte chu kum tam tak Mizote tan buaina thlentu an nih tawh avangin, ramria chengte chhinchhiah chu dan loa Mizorama lo lutte zawn chhuahna kawng awlsam tak a nih dawn avangin dan thar duan a ni tih a sawi.
Zoramthanga chuan, dan hi ṭha taka kalpui a nih chuan, dan loa Mizorama lutte'n Mizoram khua leh tui dik takte chanvo an chhuhsak ṭhin chu a veng thei tura ngaih a nih thu a sawi a, "Hemi piah lamah hian vemhimna pawh awlsam leh khauh zawka kalpui a nih theih beisei a ni," a ti.
Chief Minister sawi danin, National Register of Indian Citizens leh Multipurpose National Identity Cards hmanga ram mipuite chhinchhiah an nih angin, The Mizoram Maintenance of Household Registers Bill hmang hian Mizoram khua leh tui dik takte chhinchhiah an ni dawn a; chuta tana sum hman belh ngai zat tur chhût chhuah la ni lo mah se, sum tam tak sên ngai lo tura rin a ni.
Hetih lai hian, March 2019-a Assembly session neih ṭuma bill pass dangte chu Governor-in assent a pe vek tawh a; a hnu thla thum - June thlaa Assembly session-a bill pass-te pawh assent a pe vek tawh a ni.
