KHAWTHLIR

Zoram Peoples' Movement (ZPM) office bearer tharte chu nimin khan party pisaah president Lalliansawta kaih­hruaiin an ṭhukhawm a, ZPM secretary general atan K Sapdanga an ruat. Meeting-ah hian ZPM President bakah office bearer thar dang - vice president pathum Dr Kenneth Chawngliana, Lalthansanga leh Rev. Darchungnunga te leh treasurer C Lalṭanpuia te an tel kim a ni.

South Tuipui Assembly constituency MNF chuan thuchhuah siamin, Hnahthial district tihpuitlinna tura Mizoram sorkarin hma a lakna kal zelah, Hnahthial deputy commissioner tur August 5, Thawhṭannia ruat a ni ta chu lawmawm an tih tak zet thu an tarlang. Chief minister Zoramthanga leh bialtu MLA Dr R Lalthangliana chungah lawmthu an sawi a, Zoramthanga kaihhruai sorkar leh an bialtu MLA ṭawiawm zel turin South Tuipui mipui an sáwm a ni.

PRISM party chuan thuchhuah siamin, Tripura-a chêng Bru-te ECI-in 'Ordinary Residents of Mizoram' nihna a pek tih­tawp a nih theihna tura PIL thehluh an tumah signature campaign an nei mek zel tih an tarlang a, "Ai­zawla college, NGO office leh dawr hrang hrangah hming ziahna bu kan dah a, mi 17,580-in signature an pe tawh. Signature petu zawng zawng chung­ah lawmthu kan sawi a, signature pe zel turin kan sáwm a ni," an ti.

MZP North Khawlek branch, MSU Vanbawng sub-headquarters, Lamherh Students' Union leh Suangpuilawn Students' Union-te chuan Joint Students' Union tih hming invuahin thu­chhuah an siam a, Saitual district-a awm an duh loh thu an tarlang a, "Saitual district-ah keini tlangdung hi min rín lut lo turin kan ngen a, kawng tam taka harsatna kan tawh theih dawn avang leh, a bikin zirlaite tan harsatna lian zawk a awm theih dawn avangin min dah lo hram turin sorkar kan ngen a ni. Saitual district-a min dah a nih chuan a tàwp thlengin kan dodal dawn a ni," an ti.