China-a kea kalte chawimawina Meet the Heroes buatsaih dawn

Tourism minister Robert Romawia Royte chuan, Mizoramin remna leh muanna a neih hmangin khualzin hîp luh an tum thu a sawi a, "Thupuiah Peace - Pays kan ti a, a bul ṭanna atan August 8, Ningani hian Vanapa Hall-ah Meet the Heroes : Peace Pays kan buatsaih dawn," a ti.

Robert Romawia Royte chuan nimin khan a pisaah thuthar thehdarhtute a kâwm a; khawvelah war tourism a lâr thu sawiin, "Vietnam pawh Vietnam War vangin a lâr a, an market thiam a, khualzin an hîp nasa hle," a ti a; remna leh muanna pawh zawrh thiam chuan khualzin hîp luttu ṭha tak a nih theih thu a sawi.

Mizorama remna leh muanna chu mumal taka tihlâr an tum tih sawiin Tourism Minister chuan, "Hnam sipaite'n huaisen taka ram leh hnam tana hma an lo laknate pholangin, Zo fate chawisan kan tum. Tun ṭum bikah hian China-a kea kal te, kawng lo sâttu mi pali, a thawh khatnaa kal mi 40 leh a thawh hnihnaa kal mi 108, an vaiin mi 144-te chawimawina hun Meet the Heroes hman kan tum a ni," a ti.

Tourism Minister sawi danin, Meet the Heroes buatsaihna atan hian cheng nuai 40 hû project siam a ni a, sum hmuhna tura beisei chu Ministry of Tribal Affairs aṭangin cheng nuai 20, NEC (Ministry of DoNER) aṭangin cheng nuai 10 leh mimal sponsorship aṭangin cheng nuai 10 hmuh beisei a ni.

Ministry of Tribal Affairs aṭanga sum hmuh tura beisei nuai 20 hmuh a ni tawh a, sponsorship aṭangin Rs. 2,00,000 an hmu tawh a, NEC aṭangin hmuh la ni lo mah se, hmuh ngei an beisei. Sum an neih tawhte hmangin Mizoram state sorkar sum tel loin Meet the Heroes an buatsaih dawn a ni.

Meet the Heroes hi August 8, Ningani chawhma dar 11-ah Vanapa Hall-ah hman tur a ni a, chief minister Zoramthanga chu khuallian a ni dawn a, deputy chief minister Tawnluia chu khualzahawm a ni ang. Robert Romawia chuan, Peace Pays hnuaiah khualzin hîp turin kawng hrang hrangin hmalak zel a nih dawn thu sawiin, "Peace Pays hi India leh khawvel zau zawkah pawh remna leh muanna hlutzia pholanna atana hman kan tum," a ti.