Zophaia in sak mekte thiah a nih theih nan MZP-in hmala turin CM an ngen

MZP chuan nimin khan chief minister Zoramthanga hnenah lehkha an thehlut a; Bairabi Zophai hmunah Assam mite'n biak-in leh dawr tur in an sa tih tarlangin, chu'ng in sakte chu ṭhiah a nih theihna atan hma la vat turin an ngen.

MZP chuan, kan ram kan chân belh zel loh nan nasa takin hma an lak ṭhin thu tarlangin, "Kan hmalakna hian awmzia a nei ṭhin lo hle. Mizoram sorkarin ramri chungchang ngaihtuah tura a din Core Committee pawhin hma a la hleithei lo hi a manganthlak kan ti hle a, rang taka Core Committee kan meeting theih nana hma min laksak turin kan ngen che a ni," an ti.

Bairabi Zophaiah hnam dang biak-in, hman ni lawka mi tu tih hriat lohte'n an tihchhiat chu sak ṭhat leh a nih thu tarlangin MZP chuan, "RCC hmanga sak leh a ni a, hei mai bakah hian kawng ànah in ṭha tak sain, dawr tête an lo siam leh tawh a ni," an ti a; biak-in sak leh a bula dawrtê tur sak lai chu sak chhunzawm a nih loh nan leh, ṭhiah a nih theihna atan hma la turin chief minister Zoramthanga an ngen a ni.

MZP chuan, Zophai leh a chhehvelah sorkar laipuiin status quo kengkawh (maintain) turin Assam sorkar leh Mizoram sorkar a tih thu tarlangin, "Mizoram lamin ban pakhat pawh kan phun luih loh laia hetia Assam-in kut an lo thlak leh ta mai hi pawi kan ti hle a ni," an ti.