END Minister leh NCB officer-te'n Ruihhlo do chungchang an sawiho

Excise & Narcotics department (END) minister Dr K Beichhua chuan nimin khan New Delhi-a Narcotics Control Bureau (NCB) pisa a tlawh a; officer-te nen ruihhlo do dan tur leh ruihhlo dona atana thil pawimawhte a sawipui.

Dr K Beichhua chuan, Mizoram chu Myanmar ramri depa awm a nih avangin ruihhlo luhká ber a nih thu leh, Mizoram kal­tlanga India rama ruihhlo lutte chu Mizoram buaina chauh ni loin India ram pum buaina a nih thu a sawi a, "Hei vang hian central sorkar leh state sorkar ṭangrualin ruihhlo do a pawimawh," a ti.

END Minister chuan, tunlai bungraw changkang zawk nena Excise enforcement-te thuam ṭhat a pawimawh thu a sawi. Hemi chungchangah hiam NCB officer-te chuan, an theihna zâwnah khawmuang loa tihhlawhtlin an tum thu an sawi a, central assistance awm theih dan hrang hrangte Dr K Beichhua an kawhhmuh nghal.

NCB deputy director general B Radhika chuan, "Ruihhlo do kawnga Mizoram dinhmun ka hriatpui che u. Sorkar laipui aṭanga ṭanpuina awm thei angte pek chhuah zel kan inhuam," a ti a; Mizoram END chu ruihhlo do kawngah nodal agency an nih angin, state chhunga agency hrang hrangte'n ruihhlo an man leh tihral report kimchang thla tina thehlut ṭhin turin a ngen.

Meeting-ah hian, ruihhlo do kawnga thawhhona atan zirhona, state sorkar leh NCB-te'n ṭang­ruala workshop buatsaih ṭhin leh ṭangruala ruihhlo dap chhuah beihpui thlakte an rêl a ni. Minister of state Dr K Bei­chhua hian nimin vek khan Mizo­ram ruihhlo do chung­changah New Delhi-a United States Embassy-a Drug Enforcement Administration (DEA) official-te a kâwm.