Cooperation Minister-in MULCO hmun a tlawh

Cooperation minister C Lalrinsanga chuan, nimin khan Mizoram Milk Producers' Cooperative Union Limited (MULCO) hmunhmá, Ṭhuampui, Aizawla mi a tlawh a, bawnghnute sawngbawlna hmunte a fan kual bakah, thawktute leh MULCO Board of Directors-te nen an inkâwm.

Minister hi Registrar of Cooperative Societies Ankita Chakravarty leh officer dangte'n an ṭawiawm a, MULCO chairman Vanlalchhunga leh Board member ten an lo dawngsawng a ni. MULCO-ah hian thawktu mi 70 vel an awm mek.

C Lalrinsanga chuan, MULCO chu a ṭhang hle a, bungrua chi hrang hrangah hma a sawn nasa tih sawiin, MULCO hotute leh thawktute chu taima tak leh ṭhahnem­ngai taka thawk zel turin a fuih a; Cooperative dante palzût a thiang lo tih sawiin, "Thawktute'n Board of Directors an zah thiam a ṭul a, Board of Directors pawhin an mawhphurhnate an hriat a pawimawh," a ti.

Cooperation Minister chuan, market kalphungte zir chiang a, chumi anga inher rem a ṭul thu te, MULCO chu tun aia hlâwk zawka kalpui a nih theih nan leh thawktute hlawh pawh ṭha zawk pe thei turin inzâr pharhna kawng zawn zel a ṭul thute a sawi a; MULCO hnathawkte chu neitu rilru pûa thawk ṭheuh turin a chah.

MULCO hi kum 1984-ah AH&Vety department hmalakna a din a ni a, kum 1995-ah AH&Vety aṭangin a hranpa hlakin a ding ṭan. Sorkar kum liam ta, 2018-19 chhung khan bawnghnute litre 20,08,030 an hralh a, chu chu kum 2017-18 chhunga an hralh litre 18,09,405.40 aiin litre 1,98,624.60-in tam zawk. Kum 2018-19 chhunga bawng­hnute hralhna aṭangin Rs. 10,76,87,402.60 an hmu a, bawnghnute aṭanga thil dang an siam hralhna aṭangin Rs. 4,88,35,886 an hmu bawk.