HIV/AIDS donaa hmalak dan tur sawiho

Aizawl District AIDS Prevention and Control Committee (DAPCC) chu nimin khan an chairman Vanlalngaihsaka, district bawrhsap hoin a pisaah an ṭhu khawm.

Aizawl DC Vanlal­ngaih­saka chuan, HIV kai awlsam thei deuh bika ngaih, high risk group chauh ni lo, sorkar, kohhran leh khawtlanga inhmang tak takte pawhin an vei ta chu Mizoram din­hmun ṭhat lohzia ti­chiangtu a nih thu a sawi.

Meeting-ah hian, HIV/AIDS veite leh ruih­hlo hmangsualte chanvo, birth certificate, bank account, Aadhaar card, etc. anmahni bakah an tu leh fate'n an neih theih dan tur sawiho a ni a; birth certificate an lak dawnah Economic and Statistic department-a fee chawi ngaite chawitir ve loh theih a nih leh nih loh sawiho a ni.

Aizawla sorkar de­part­­­ment hrang hranga thawkte tan HIV/AIDS awareness campaign neih te, sorkar office tinah HIV/AIDS infor­mation, education & communication (IEC) material târ dan tur te, office tinah condom a thlawna lak theih tura dah chungchangte an rêl a; Aizawla damdawi zuar zawng zawngte HIV/AIDS chungchanga zirtir­na pek chungchang an sawiho bawk.

Meeting-ah hian DAPCC programme ma­nager Dr R Zonun­mawii'n Aizawl district bika HIV/AIDS vei ṭhen­khatte zirchianna, an khawsak dan, an chhungkaw chanchin, mimal nun, vantlang nun leh eizawnna chungchangte a sawi a; MSACS project director Dr Lalthlengliani leh SHALOM CEO Dr Chawnglungmuana ten an hmalaknate an sawi a ni.

Sorkar hnathawkah awareness campaign

Sorkar office-ah inzirtirna thuziak târ

Sorkar office-ah condom lak theihna dah

Damdawi dawrah HIV/AIDS zirtirna pek