Vawk hrisel chiah talh turin hriattir

Mizoram chhehvelah tunlai hian vawk natna Porcine Reproductive and Respiratory Syndrome (PRRS) leh African Swine Fever a lênga hriat a nih avangin, Lunglei district magistrate K Lalrinzuali chuan Lunglei district-a hman turin vawk kaihhnawihah thupek a chhuah a; vawk hrisel chiah talh tur leh vawk damlo hralh lo turin a hriattir.

Lunglei District Magistrate hian Cr.PC Section 144 tlawh­chhanin thupek a chhuah a, thla hnih chhung hman tur niin, thupek zâwm lote chu IPC Section 188 hmanga hrem theih an ni.

Hetih lai hian, kumin June thla tawp lam khan Lungleiah PRRS vei vawk pahnih sèr a ni a, mipuite leitir an ni. Thu dawn danin, June thla tawp lamah police-te'n khawchhak lam aṭanga lak luh vawk pali an man a, district magistrate hnena hruai a nih hnuah endik a, dah hrang turin magistrate-in police-te a hriattir a, police-te'n dahna an neih mai loh avangin vawk neitute chu lo enkawl chhunzawm turin an ti a ni.

Vawk neitute chuan magistrate leh police-te hriattir loin PRRS vei vawk pahnih chu an sêr a, mipuiah an hralh a; chu vang chuan vawk neitute chu thubuai chi thum - dan loa vawk lak luh, Court thupek zah lo leh rûkrûk thubuai siamsak an ni.

1. Vawk thi reng reng ṭha taka phûm vek tur a ni.

2. Vawk thite khâmah emaw, kawrah emaw paih mai loh tur.

3. Lunglei district chhungah khawi aṭang mahin vawk lak luh phal a ni lo.

4. Lunglei district aṭangin district páwnah vawk lak chhuah phal a ni lo.

5. Vawk talhtute'n vawk hrisel chauh an talh tur a ni.

6. Vawk neitute'n vawk damlo an hralh tur a ni lo.