PRISM party president Vanlalruata chuan, Tripura-a awm Mizoram Bru-te chu Mizoram chhuahsana pêm an ni tih sawiin, kum 20 chuang Mizoram an chhuahsan hnu pawha Mizorama vote an la nei reng chu dan kalh a nih thu a sawi a; Mizorama vote an la neih reng chungchangah Election Commission of India (ECI)-in dan an bawhchhia tih sawiin, ṭangruala ECI nawr lêt a ṭul thu a sawi.

PRISM hruaitute chuan nimin khan Aizawl Press CLub-ah thuthar thehdarhtute an kâwm a; Vanlalruata chuan, "Bru-te kum 20 vel Tripura-ah an awm tawh a, chuti chungin Mizoramah vote an la nei reng a, Mizoram páwna awmte'n Mizorama vote an nei thei hian dan a kalh a ni. Mahni awmna leh chenna hmuna vote neih mai tur tuih hi danah a inziak a ni," a ti.

Vanlalruata sawi danin, India khua leh tui, kum 18 tling tawhte chuan an awmna hmunah vote an nei tur a ni a, chu chu danah a awm sa. Mi tu emaw chu hmun danga a insawn chuan, a awmna hluia electoral roll aṭangin an paih a, a awmna tharah electoral roll-ah thun a ni mai ṭhin.

PRISM President chuan, "Bru-te hi Mizoram aṭangin India ram chhung tho, Tripura-ah dan kalh miah loin an pêm a, chuvangin, an pêmsan tawh khuaa an vote hi chu paih tur a ni a, an awmna Tripura-ah vote an nei mai tur a ni," a ti.

ECI-in September 6, 2004-a lehkha a tihchhuahah Tripura-a Mizoram Bru-te chu chu Ordinary Resident of Mizoramah puan a ni tih sawiin Vanlalruata chuan, "Hemi a puannaa dan a tlawhchhan hi Representation of People Act 1950 a ni lo a, Kasmiri pundit-te'n hmun danga awm chunga vote an neihna tura dan, J&K bik dan 1957-a siam tlawhchhana siam a ni a, India ram hmun danga mite nena hman kawp theih loh dan a ni," a ti. Mizoram páwna awm Bru-te Mizorama vote neihtirna atana ECI order chu dan kalh a nih thu a sawi.

Vanlalruata chuan, "Ordinary Resident of Mizoram-a Bru-te puangtu hi ECI a ni. Mahse, ECI puan tur a ni lo a, an puang ve hi dan kalh a ni. An puang duh a nih pawhin, Central sorkarin a puang ang a, Central-in a puan hnuah ECI chuan vote a neihtir mai chauh tur a ni," a ti.

Hemi chungchang hi sawi chhuah a la ni ngai lo tih sawiin Vanlalruata chuan, NGO-te pawhin ngaihtuahna an la sêng ngai loa an hriat thu leh ngaihtuahna sen thar a ṭul thu a sawi a, "ECI-in dan an bawhchhia tih puangzar ila, ECI hi i nawr lêt ang u. Hma la nasa thei leh awmze nei ber tur chu state sorkar hi a ni a, state sorkar a chêt a ngai," a ti. PRISM-in an bawhzui dawn a, NGO-te leh political party dangte pawhin hma an lak a ṭul thu a sawi.

PRISM President chuan, Bru chungchanga NGO Coordination Committee-in hmalakna leh total bandh huaihawt an tum hi thil tih âwm taka an ngaih thu a sawi rualin, election buai palh ta se, thil thleng theite uluk taka ngaihtuah a, rilru fîm put a ngai hlea an hriat thu a sawi a ni.

Vanlalruata chuan, Chief Electoral Officer-in inthlan chu buatsaih a ni dawn tih a sawi tawh tih sawiin, "Hmanah Suangpuilawn bialah eng emaw avangin vote tlemtê a tla a, mi dang zawng zawngin an duh loh rawn kha a tling tawh. Khatiang deuh khan, tun election-ah hian kan duh loh rawn hi tling palh thei a ni ang tihte pawh hi ngaihtuah ngai niin kan hria," a ti.