EC hnenah NITI Aayog VC insawifiah

NITI Aayog vice-chairman Rajiv Kumar chu Congress-in minimum income guarantee scheme a tiam chungchang a sawisel avangin Election Commission chuan hriattir a lo pe tawh a, nimin khan EC hnenah a thu sawi chungchang a sawifiah.

Rajiv Kumar chuan minimum income guarantee scheme, NYAY chungchang a sawi chu economist a nihna aṭanga mimal ngaihdan a ni, tiin a thusawi hi Congress scheme chungchanga Aayog thlirdan anga ngaih tur a nih loh thu a sawi.

Congress party-in Lok Sabha inthlanpuia hnehna chang a, sorkar an siam a nih chuan ramchhung mi rethei zual 20% te hnenah chhawmdawlna, kum tin Rs 72,000 an pek tur thu an sawi a ni. Hei hi Kumar hian sawiselin, Congress party chu hnehna an chan theihna tura engpawh sawi leh ti duhah a puh. A thusawi vang hian EC chuan hriattirna pein, 'bureaucratic executive' zinga mi a nih avangin politics chungchangah a inrawlh ve tur a ni lo, a ti.