Lalnghinglova'n MZU Southern Campus nawr tum

Lok Sabha inthlanpui neih tura ZPM leh Congress thlàwp inde­pendent candidate Lalnghinglova Hmar chuan nimin zing khan Ono Hotel, Lungleiah thuthar thehdarhtute a kâwm a; MP atana thlan tlin a nih chuan ramria insumdawn tawnna (border trade) ṭha taka kalpui a ngaih pawimawh thu leh chuta tan chuan ṭan a lak dawn thu a sawi.

Lalnghinglova Hmar chuan, Act East Policy chungchang sawiin, "Prime Minister leh minister dangte thusawi bak policy document mumal tak a la awm meuh lo. MP atana thlan tlin ka nih chuan mumal zawk leh Mizoram tana

ṭha zawk tur policy a awm theihna atan, Mizo himna tur siin hma ka la ang a, a ṭulna hmunah ka bawhzui ang," a ti.

Bangladesh nena inkalpawhna atana passport emaw, lehkha ngai ṭhin chu tunah ken­kawh mumal a ni tawh lo tih sawiin Tetea Hmar chuan, "Tunah chuan Bangladesh aṭangin a duh an lo lut a, a duh an chhuak a. Ramri inkalpawhna hi state subject ni lo mah se, MP ka nih chuan ramri chungchangah hma ka la ang," a ti a; ramria check post mumal tak siam a pawimawh thu a sawi.

Lalnghinglova chuan, chhim lam mipui ngaih pawimawh Mizoram University Southern Campus chu a puitlin ngei a duh thu sawiin, "MZU hi central university a nih avangin state sorkar tih theih bâk a awm. MP ka nih chuan a sawina tur hmunah ka sawi ang a, bawhzui ngaihna hmunah ka bawhzui ang. MP ka nih anga theihtawp ka chhuahnain kawngro a su ngeiin ka ring," a ti.

A eizawnna ber chu journalist a nih thu sawiin Lalnghinglova chuan, "Journalist-te mamawh leh harsatna a hre chiangtu ka ni ve a, MP ka nih chuan journalist-te hmasawnna atan theihtawp ka chhuah ang," a ti a; a journalist puite a tlanchhiatsan loh tur thu a sawi.

Tetea Hmar chuan, MP a nih chuan ṭhalaite eizawnna atan theihtawp chhuah a tum thu sawiin, "Corporate, PSU, etc aṭangtein ṭhalaite eizawnna tur dap ka tum. Music, sports, art leh fashion lamah pawh ṭhalaite hmasawn zelna tur tam tak a awm a, a thlenna hmun turah thlenin, ka bawhzui dawn a ni," a ti.

MNF President-in CAB bak an khingpuite'n beihna tur an hriat loh thu a sawi chungchanga zawhna chhangin Lalnghinglova chuan, "Ka khingpuite beih vak vak hi ka thil tum a ni lo a, tih loh zel ka tum," a ti a; MLA inthlan neih zawh tâkah MNF-te ngei pawhin an candidate atan an sàwm ve avangin, MNF pawhin amah chu an duh der ve nia a hriat thu a sawi.

Lalnghinglova Hmar ṭawiawmtu ZPM senior vice chairman F Rodingliana chuan, "Thla thum chhung lek hian MNF beihna tur kan hre nual, an contract cancel sakte zawng zawng pawh. Mahse, khingpuite beih vak vak hi kan thil tum leh duh dan a ni lo. Thla thum lek chhunga min beihna tur an hre lo tih hi thil nuihzatthlak a ni," a ti.

Citizenship Amend­ment Bill tihpuitlin tumtute a dodal dawn thu sawiin Tetea Hmar chuan, Mizoram mipui, ruling party leh opposition party te, kohhran hrang hrang te, sorkar hnathawk zawng zawngte chu amah vote vek turin a ngen a ni.