Thli leh rial vangin in thahnem tak a chhia

April 1, Thawhṭannia thlipui tleh vangin Mizoram hmun hrang hrangah chenna in 164 a chhia a; April 2, Thawhlehni tlai leh zana ruahsur, thlipui tleh leh rial tla vangin in chhia eng emaw zat a awm belh leh a, electric line chhia a awm nual bawk.

Sorkar thuchhuah tarlan dan­in, April 1-a thlipui tleh vangin Aizawl district-a Ṭhuampuiah in pahnih a chhia a, pakhat zawk chu a chhe vek a ni. Kolasib district-ah in 38 a chhia a; Bilkhawthlirah in 22, Phaisenah in 10 leh Buhchangphaiah in paruk chhiain, in chhe vek erawh a awm lo.

Lawngtlai district-ah chuan in 16 a chhia a; chungte chu - Bethalmualah in pasarih, Sangau-II ah in pali, Saizawh East-ah in pathum leh Lawng­tlai Council Veng leh Vartek-ah in pakhat ve ve a ni. Mamit district-ah in 19 chhiain, Kawnmawiah in 11, Chhippuiah in paruk leh West Phailengah in pahnih a chhia a; chhe vek erawh a ni lo hlawm.

Lunglei district-ah in 61 a chhia a, chu'ng zinga in 15 chu a chhe vek. Lunglei khawpui chhung bikah chuan - Zohnuai leh Pukpuiah in pariat ve ve, Venghlunah in pali, Venglaiah in pathum, Bazar Veng, Zotlang leh Electric Vengah in pahnih ṭheuh leh Ramthar Veng leh Zobawkah in pakhat ve ve a chhia a; Ruallungah in 15, Mau­tlangah in panga, Vairawkaiah in pali, Cherhlunah in pathum bakah, Hauruang leh Lungsenah in pakhat ve ve a chhe bawk.

Siaha district pumah in 24 a chhia a; chu'ngte chu - Noaotla (Niawhtlang) I-ah in pakua, Noaotla-III ah in paruk, Siahatla-ah in panga, Theiva-ah in pahnih leh, Siahatla-III leh Meisatla-II ah in pakhat ve ve a ni. Serchhip district-ah in pali a chhia a, Keiṭumah in pahnih leh Khumtung leh Thenzawlah in pakhat ve ve a chhiah a ni.

Hetih lai hian, Thawhlehni tlai khan Chamring khua leh a chhehvelah nasa takin rial a tla a, rial tla chuan chenna in eng emaw zat déng chhiain, chu'ng zinga panga chu luah tlak rih lohin a chhia. Rial tla hian Chamring khuaa in dangte pawh a chung rangva a dêng chhe nual a, in chung rangva chhe miah lo chu in 10 vel chauh a awm niin an sawi. In chhiate chu nimin khan khawtlangin hnatlangin an thawm ṭha a, an khaw ṭhenawma mite'n an pui bawk.

Thawhlehni zan vêk khan Tlungvel khuaa lal in chu thliin a chhem tlu. He lal in hi kum 1956-a sak a ni a, Mizorama lal in ding tlemtê la awm zinga mi a ni.