Rannung seh natna chungchang zirho a ni Mizoramah scrub typhus vei 129 hmu tawh

Health department chuan April 2-3, 2019 chhung khan Assembly Annexe Conference Hall-ah Health department-a medical superintendent, chief medical officer leh medical officer-te tan rannugn seh natna chungchang zirhona, 'Capacity building work­shop on Public Health Action for Prevention & Control of Scrub Typhus' an buatsaih. Mizoramah scrub typhus vei mi 129 finfiah a ni tawh tih tarlan a ni.

Training-ah hian Christian Medical College Vellore-a pro­fessor (Infectious Diseases) Dr George M Varghese leh National Vector Borne Diseases Control Programme (NVBDCP)-a consultant Dr Kaushal Kumar te chu resource person an ni a; Health Services director Dr H Lalchungnunga'n kaihhruaiin, Health principal director Dr F Lallianhlira pawh a tel.

Health department hnuaia IDSP state nodal officer Dr Pachuau Lalmalsawma chuan, Mizoramah scrub typhus a hluar tawh avangin ṭan lak nasat a ngaih thu sawiin, scrub typhus chu rickettsial disease hlawm thum - scrub typhus (ST), spotted fever group rickettsiae (SFGR) leh typhus group rickettsiae (TGR)-ahte ṭhen a nih thu a sawi.

Dr Pachuau Lalmalsawma chuan, "Tun dinhmunah scrub typhus natna finfiahna hmanruate kan la neih loh avangin Mizo­rama scrub typhus natna hri­lenna hmun aṭangte hian a nemnghehna (confirmation) atan mihring leh sazu aṭanga thisen (sample)-te ICMR (RMRC-NE), Dibrugarh-ah thawn ṭhin a ni a, tun dinhmuna sample thawn tawh zat chu 421 a ni," a ti.

Dr Pachuau Lalmalsawma sawi danin, ICMR (RMRC-NE), Dibrugarh-a thisen sample endik tura an thawn tawh 421 zinga 129 chu srcrub typhus a ni tih finfiah a ni a; 62 chu rickettsial natna, 29 chu spotted fever group rickettsial (SFGR) leh pathum chu typhus group rickettsial (TGR) an ni.

Dr Lalmalsawma chuan, rickettsial disease zinga mi, scrub typhus chu India rama natna buaipuiawm ber pakhat a ni

ṭan tawh tih sawiin, "SFGR leh TGR-te chu scrub typhus ang thoa hlauhawm an ni nâin, report a la tam lo a, a hmuhchhuahna leh report lamah IDSP (Mizoram)-in nasa taka hma lak leh hmachhawpa dah a ṭul tawh a ni," a ti.