MNF sorkarah hna lâk a 'fair' ngai lo - MPCC & ZPM

MPCC & ZPM Publicity Committee chuan thuchhuah siamin, MNF kaihhruai sorkar hnuaiah hna lakna reng reng a 'fair' ngai lo a, hun rei lote chhungin sorkar hna laknaah MNF sorkarin dik lo takin thil a ti leh hman tawh niin an tarlang a, "Sorkar hna lakah an sorkar hmasaka an kal­phung, a tling apiang ni lo, an duhsak zawng apiangte thun an chîn ṭhin chu an la kalpui zel a ni," an ti.

MPCC & ZPM chuan, Social Welfare department (SWD) hnuaia Poshan Abhiyan (Nutrition Mission)-a thawk tur laknaah written test-a a ti ṭha zual mi 54 chu computer test nei tura koh an ni tih sawiin, "A hnu lawkah merit list-a lang lo mi 20, MNF duhsak zawng ni ngeia ngaihte chu computer test turin koh belh an ni," an ti a; social media-ah sawiselna a nasat avangin SWD Minister thupekin hna lakna chu a vaia ṭhiah (cancel) a nih thu an sawi.

Poshan Abhiyan-a thawk tur laknaah hian SWD minister Dr K Bei­chhua'n a tîr aṭangin hriattir a ni lo niin Assembly House a hrilh tih sawiin MPCC&ZPM chuan, "Assembly House-a Minister insawifiahna hi tualchhung daily newspaper-ah dâwt a ni tih chiang taka tarlan a ni a, SWD Minister remtihna veka kalpui a nih thu chiang taka tarlan a ni. Sorkar hna lakna dik lo taka kalpui a tum leh, thu dik lo Assembly House a hrilh avangin SWD Minister hi minister ni zel tlakah kan ngai lo," an ti.

School Education minister Lalchhandama Ralte-in MPSC kaltlang loa zirtirtu 1,000 vel lak tum a nih thu a sawi chung­changah MPCC & ZPM chuan, "MPSC kal­tlang ngeia hna lak chu a 'fair' ṭhin em avang leh an duhsak zawngte thun an duh si avanga hetianga ruahmanna hi siam ta ni ngeiin kan hria. A pawi kan ti a, ṭhalai lehkhathiam rualte hmusitna dik takah kan ngai," an ti a; MNF sorkar hmasak laiin SSA leh School Education department-a thawk turin an duhsak zawng, zaithiam leh mi lâr deuhte an thun

ṭhin thu an sawi.

MPCC & ZPM tarlan danin, MIMER, Falkawna contract labour anga ni tina inhlawh turin Congress sorkarin Falkawn MHIP kaltlangin mi eng emaw zat an la a, chu'ngte chu tun hnai khan cancel niin, MNF party worker, an mi duhsak zawngte thun luh an ni. An thun thar zinga ṭhenkhat, MNF party worker-te chuan tunah chuan aikal an la leh tawh a ni.