Dâwt politics kan hnâwl ngam a ṭul - Zoramthanga

MNF president Zoram­thanga chu nimin khan Serchhip district-a khaw ṭhenkhatah Lok Sabha inthlan atan a campaign chhunzawm a, vantlang inkawma thu a sawinaah, dâwt politics vanga hlâwk­na hmuh tum tlatte hnâwl ngam a ṭul thu a sawi.

Zoramthanga hian nimin khan Thenzawl, Lamṭhuamthumah leh Serchhip bazar kâwnahte thu sawiin, Rev. Chan­chinmawia thihna chung­chang a sawi chhuak a, "Kan sakhaw puithiam thih chungchangah khan, anmahni pawhin thu dik lo a ni tih hre chiang em em chungin MNF ho chu tualthattuah Congress hoin min puh lui ngar ngar a. Police special investigation team (SIT)-te'n 'Mi dang kut a lang lo' an ti a, Court pawhin a pawmpui thlap a ni," a ti.

A hnuah CBI an ko lut a, CBI pawhin mi dang sûlhnu an hmuh loh thu leh chu chu Court pawhin a pawmpui leh thu sawiin Zorama chuan, "Thu dik an hriat hnu pawhin inthlan dawn a piangin an sawi thar leh zel a ni. Engmah chhui chhuah tur an hre lo. Zu zawrh chíng, dâwt politics vanga hlâwkna hmuh tum tlatte hi i hnawl ngam ang u," a ti a; chung lamin ro a rêl a, Congress-in MLA panga chauh an nei tawh a, nakinah chuan an la ṭîl-

ṭiak vek dawn niin a sawi.

Zoramthanga chuan, Lok Sabha MP atana MNF candidate C Lalro­sanga chu Pathian ṭih mi a ni tih sawiin, "In khuaah vote hmu sang ber nihtir lo tum rawh u, in tisual lo ang. Amah hi mi rinawm, ṭawngṭai leh Pathian thu ringawt buaipui ṭhin mi a ni," a ti.

MNF President chuan, an khingpui tur ber chu Congress leh ZPM-in candidate inṭâwm an siam chu a ni tih sawiin, an mangan avangin an páwl symbol pangngai hmang thei loin an awm tih a sawi a, "An chhinchhiahna ber pawh sawi sual palh a hlauhawm a, an lo kal vete a nih chuan anmahni lo zawt mai rawh u," a ti. An khingpuite chu zu zawrh duhtute an nia sawiin, chuvang chuan vote pe lo turin mipui a chah a ni.