MNF MLA-te Rosanga tan an campaign
Lok Sabha MP inthlanpui atana MNF candidate C Lalrosanga leh MNF general secretary Lalruatkima, minister-te chuan April 1-2, 2019 khan Mizoram chhim lam khaw hrang hrang fangin an campaign. C Lalrosanga chuan, Lawngtlaiah thu sawiin, tun hmaa Pathian thu vanga Zoram dung leh vâng a fan tawhte chu tunah Pathian thu vang bawkin fan kual leh a ngai a, a rawngbawl dan erawh a dang ta deuh niin a sawi.
C Lalrosanga chuan, "Tun hmaa kan rawngbawl ṭhin ang lo deuh zawngin ka kalkawng her remin a awm a, kan ram leh hnam, kan sakhaw aiawha ding tur leh kan ram tana MP-in a tih theih ang zawng zawngte mawhphurhna la turin ka ding chhuak a, Central sorkara MP ṭangkai tak leh mawhphurhna hlen chhuaktu ni ngei tur te, CAB chungchanga MNF sorkar leh CM Zoramthanga'n chak taka an dodalnate ram leh hnam aiawha do ve tur leh, CAB duh lo lama bán phar turtein ka ding a ni," a ti.
Lalruatkima pawhin thu sawiin, "MP election hmasaa Congress auhla kha MP atan chuan kum upa, senior experience nei an ngai an ti a, tunah tuaithar an candidate leh a, ṭhalai an ṭha an ti leh thung a, ṭanhmun mumal an nei lo," a ti. MNF sorkar thar piang chu hna thawk tura ding a nih angin sorkar tirh aṭangin an hla sak key an tisang hle nia sawiin, MNF hna chu a ṭha hle tur a nih thu a sawi.
C Lalrosanga tan hian minister of state pahnih K Lalrinliana leh TJ Lalnuntluanga te chu an bial ve veah an campaign mek. K Lalrinliana chuan nimin khan Bûkpui tlangdung khaw hrang hrang fangin thu a sawi a, ZPM leh Congress ṭang dunin theihtawp chhuahin TV leh social media lamah an candidate vawrh lâr tum hle mah se, a tla na tak tak thei lo niin a sawi.
K Lalrinliana chuan, MNF leh BJP-te sawi zawm tum tam tak an awm tih sawiin, BJP thawhpuitu zawk chu ZNP leh Congress party niin a sawi a, "CAB duh lo tak taktute chu MNF chauh an ni a, CAB dodala a awm zel theih nan C Lalrosanga kan vote tlin a ngai a ni," a ti.
TJ Lalnuntluanga pawh a bial Champhai South khaw hrang hrangah MP inthlan atan a campaign a; khaw hrang hranga thu a sawinaah, MNF sorkar hnathawh hrang hrang sawi langin, MLA inthlanpui campaign laia mipui laka an intiamna tam zawk chu MNF sorkarin a tihlawhtling tawh niin a sawi.