KHAWTHLIR

Thisen pe
Vakiria Computerised Embroidery chuan nimin khan an hmun - Industrial Growth Center, Luangmualah blood donation camp an huaihawt a, Synod Hospital tan thisen unit 24 an pe a, a petute mipa 15 leh hmeichhia pakua an ni.

In kâng chhia
April 2, Thawhlehni zan dar 11:30 vel khan Thenzawl Venghlun Branch YMA Rûn a kâng a, bungrua chegn tam tak hû a kâng chhia. Thu dawn danin, in kângah hian YMA bungrua - mitthi kuang nawrna, ṭhut­thleng 300 chuang, dekchi leh bungraw dangte a kan chhiat vek a; Laldinthara te chhungkuain an luah laia dawr an siam Chawngthu Drugs Store-a damdawi leh thil dang zawrh laite leh bike, fridge leh deep freezer-te a kâng chhe vek bawk. Kângmei chhuah chhan hriat chian a ni lo.

MJA titipui
Serchhip SP thar Shashank Jaiswal, IPS chuan nimin khan Serchhip district MJA member-te a piasa léngah sáwmin, a titipui a, Serchhip district tana thawhho dan turte a sawipui. SP chuan, Mizoram nuam a tih thu leh Mizote zinga khawsak nuam a tih thu a sawi a; zawhna chhhang­in, Serchhip district-a arm license awm zat 897 aṭangin silai tung 752 an awm tawh thu a sawi bawk. Serchhip district MJA member-te hi an president C Ramengmawia'n hoin an kal a ni.

Traffic thupek
PHE department chuan April 4-6, 2019 chhungin Treasury Square-a traffic point bul leh Aizawl East DCSO (Supply deptt.) inkar kawngpui, Venghluiah tui pipe an phûm dawn a; hei vang hian Traffic SP chuan thupek chhuahin, pipe phûm hna thawh chhungin lirthei khalhtu leh kea kalte fimkhur takin a chah a, hna thawh tibuai thei tura kawngpui sira lirthei leh bungraw dang phal a nih loh thu a puang.

Animal camp
Krishi Vigyan Kendras (KVK) Lunglei district, Hnahthial chuan nimin khan National Initiative and Climate Resilience (NICRA) leh Attracting and Retaining Youth in Agriculture (ARYA) bultumin Hnahthial North-ah Animal Health Camp an buatsaih a, mithiamte'n ran eng emaw zat hriselna din-hmun enfiahin, damdawiṭul angte a thlawnin an pe nghal a ni.