Aizawl khawpuiah mimal ina motor dahna (parking) siamte sorkarin a puihna tur duan thar, Parking House Support Scheme (PAHOSS) chu nimin khan chief minister Zoramthanga'n Chief Minister's Office conference room-ah a tlangzarh. Chief Minister chuan, he scheme-ah hian financial year kal mek 2018-19 atan sorkarin cheng vbc. 10 (nuai 1,000) vel an dah phawt thu a sawi.
CM Zoramthanga chuan, PAHOSS chu ama ngaihtuahna aṭanga chhuak a nih thu sawiin, "Ni tin kum tin motor a pung zel a, kan ram leh kawngpuite a pung ve si lo a, kawng a tihlen theih loh. Engtin nge kan traffic jam loa kan siam ang, tih kan ngaihtuah a ni," a ti. Parking siamna atan kawngpui sira ramte sorkarin lei dawn se, parking atana hman tham chu cheng vaibelchhhe tél a ngai dawn tih sawiin, "Mimal in remchang laiah an sak theihna turin ṭanpui ila, anmahni'n buaipui se, a hlâwkna pawh la se la, tih ngaihtuahna kan nei a ni," a ti.
Scheme-in a huam tur chu motor tê a nih thu sawiin Zoramthanga chuan, "Motor park theihna siamna atan a thlawnin, a pekin cheng nuai khat motor pakhatah kan pe zel ang che u, kan pui zel ang che u, kan ti a ni," a ti a; car pakhat zel dahna atan Rs. 1,00,000 leh two wheeler paruk zel atan Rs. 1,00,000 pek tur a nih thu a sawi.
Chief Minister chuan, sorkar ṭanpuinaa parking house sate chuan an parking house-a motor dahte aṭangin dah/luah man an lak theih dawn thu sawiin, "Sorkarin cheng nuai chuti zat kan pe che u a, motor pakhat fee-ah cheng chuti kan hauh ve e, tih kan tum lo, a vaiin a neitu'n pumbilh vek rawh se, nuai sawm télin kan va ṭanpui tawp ang kan tihna a ni," a ti.
PAHOSS chu kawngpui âna in neite'n an duh hlea an rin thu sawiin Zorama chuan, "Kan in ka phal e, tiin kan inchuh char char ka ring. Kum tin a nuai tél an la lut thei dawn a, fapa officer neih aiin a hlâwkin ka ring. Permanent income ṭha deuh an nei mai dawn a ni," a ti a; PAHOSS chu a hlawhtlin hunah chuan, motor 40/50 dah theihna parking house bul hnaiah chuan kawngpui sírah motor dah awih a ni dawn lo tih a sawi.
He scheme atana sorkar sum sen dan turah Zoramthanga chuan, financial year kal mek March 2019-a a tawp hma atan vbc. 10 (nuai 1,000) vel an dah phawt thu a sawi a, "Financial year tharah chuan ka rilru chuan cheng vbc. 60, 70 te, a ṭul chuan vbc. 100 pawh state pawisa aṭangin dah kan tum. Financial year thara sum dah belh hmain cheng nuai 1,000 hian motor 2,000 park theihna atan pawh hma a lak lâwk theih ka ring a, a bak chu financial year thara sum tam zawkin a phuhru thei turah kan ngai," a ti.
CM chuan, "PAHOSS hi sorkarin pawisa kan ren hauh lohna tura kan tih tur thil a ni a, he kan system hian traffic jam nasa lutuk nasa taka min chhâwk theih kan ring," a ti a; kalpui ṭan a nih hnuah pawh ngaihdan fing leh fel zawkte thawh khawm zel tur a nih thu a sawi.
CM Zoramthanga chuan, Aizawl khawpuia traffic jam tihrehna turin kawng chhâwng siam an tum thu a sawi nawn a, "Kawng chhâwng main road-ah siam a, a hnuaiah kawng sira motor park tawh hauh lohna tura parking house support siam kan tum a ni," a ti bawk.
Chief Minister sawi danin, PAHOSS kalpui tur hian sorkarin Committee a din a, chairman chu Chief Minister niin, PWD, Police, Finance leh a kaihnnawih department dangte an tel. Committee chuan PAHOSS kalpui dan tur leh ṭanpuina pawisa pek dan turte an la ruahman dawn a ni.
PAHOSS tlangzarhnaah hian Aizawl Municipal Corporation mayor PC Lalhmingthanga, Planning secretary Dr C Vanlalramsanga, IGP LH Shanliana, PWD chief engineer K Lalsawmvela leh UDPA officer dangte an tel a ni.
