Champhai Zotlangah in panga a kâng ral

Nimin chawhma dar 10:30 vel khan Cham­phai Zotlangah C Vanlal­hmuaka in pali leh Sel­dinga (L) in pakhat, Assam type vek a kâng a, bung­raw chuh hman lohin a kâng chhia. Seldinga (L)-te chhungkaw luah lai RCC building erawh a kan nasat hmain ṭhelhmih a ni.

C Vanlalhmuaka in hi C Lallianpuia te chhungkua (in pahnih an luah), Lalrinfela te chungkua leh Vanlalruati te chhungkuain an luah a; Seldinga (L) te in chu Lalsiamkimi te chhungkuain an luah. Kângmei a chhuak tih hriat a nih veleh hian Zotlang khawtlang mipuiin ṭhelh an tum a, Fire & Emergency Services department an hriattir nghal bawk a, a kan nasat tawh avangin ṭhelhmih theih a ni lo.

Zotlang khawtlang chuan in kânga bungruate senghawiin hnatlang an nei nghal a, Champhai DC pisa chuan hnatlangte ei leh in senso atan Rs. 4,000 leh a ṭula hman turin silpauline pali a pe. Zotlang khawtlang hruaitute chuan nizan khan kângmei tawkte awm zel dan tur an sawiho a ni.