Dan anga TV fee la turin ngen

Mizoram Consumers' Union (MCU) chuan, nimin khan Aizawl Press Club-ah thuthar theh­darhtute an kâwm a; Telecom Regulatory Autho­rity of India (TRAI) ruahman anga cable TV fee thar lak turah dan angin consumer-te duhthlanna ngaih pawimawhsak turin Mizoram cable TV operator-te an ngen.

MCU president Prof. Chawngsailova chuan, TRAI-in cable TV kal­puinaa dan thar a siam chu langtlang taka kalpui a nih theih nana duan a ni tih sawiin, "TV pawttute'n an channel duh záwng chauh an thlang thei tawh dawn a, chumi man bakah chuan GST 18% nen an chawi tur a ni. Cable TV operator-te chuan pack emaw, channel emaw, tumah an lei luihtir thei lo a, channel an lak leh lak loh chu TV pawttute thu a ni," a ti.

Prof. Chawngsailova chuan, thla tina TV pawh man pawh a pawttute thunuaia awm tur a ni tih sawiin, "Consumer-te chuan pre-paid emaw post-paid emaw, an duh duh danin bill an pe thei a, an duh hunah channel an lei belh thei ang a, an duh hunah an paih ṭhen thei. Bill an chawi tlem leh tam chu channel an lak zak a zir zel a nih tawh dawn," a ti a; tun hmaa channel an en ngai lohah pawh pawisa chawi a awm tawh dawn loh avangin TV pawh man pawh tun hma lam ai chuan tláwm zawk tura ngaih a nih thu a sawi. 

Mizorama cable TV operator ṭhenkhatin a letling zawnga kal ang maiin thil an kalpui nia sawiin MCU President chuan, "Mizorama cable TV operator-te thil tih dan hi uluk takin kan thlithlai a, TRAI nen pawh kan inbe reng. TRAI hotute'n Mizorama cable TV operator-te thil tih dan chu report turin min ti a, kan thil hmuh dan kimchang kan hrilh a nih chuan mipui lamin an tawrh dawn avangin kan la report duh rih lo," a ti. 

MCU hruaitute sawi danin, tun dinhmunah cable TV operator ṭhen­khat dan zâwm famkim lo an awm a, an thil tih dan chu hotu sang lama thlen a nih chuan an license tihtawp emaw, sum tam tak chawitir emaw theih an ni dawn a ni.