KHAWTHLIR

Adviser to chief minister C Lalramzauva chuan, nimin khan New Serchhipa View Hotel-ah Serchhip district-a officer-te a kâwm. Serchhip district-in kawng hrang hranga hma a sawn theih nan department hrang hrangte hmalak dan te, tun din­hmuna an harsatna leh mamawhte hriatpui a, a theihna apianga ṭanpui a inhuam thu a sawi.

Election Commission of India (ECI) bultum­in nimin khan Administrative Training Institute (ATI) conference hall-ah election atana inbuatsaihna atan, ‘Training for Trainer & Facilitator’ buatsaih a ni a; India International Institute of Democracy and Election Management (IIIDEM) trainer-te'n election-a mawhphurhna neite thil pawimawh hrang hrang an zirtir. 

Home minister Lalchamliana chuan Vanglaini palai zawhna chhangin, Tripura relief camp-a Bru-te chungchangah Ministry of Home Affairs-in thuthar an la neih loh thu a sawi. Nikum khan Tripura relief camp-a Bru-te hruai kîr hna thawh a ni a, chhungkaw tlemtê chauh Mizoramah an rawn lêt a ni.

Joint Action Committee on Inner Line Reserved Forest Demand chuan nimin khan an chairman F Ngurbiakvela hoin chief minister Zoramthanga a pisaah an kâwm a, Zophai ramri chungchang an sawipui. Chief Minister chuan, ramri chungchang­ah hun thâwl zawka hmalak zel dan tur sawiho a, a ṭul anga bawhzui a ṭul thu a sawi.

SBI RSETI, Aizawl chuan Mamit district-a PMEGP loan hmute tan February 5, Thawhlehni aṭang khan MDTC-KVIB campus, Zemabawkah ni 10 awh tur training an buatsaih a, PMEGP loan hmu mi 32 an tel.

February 7-9 chhungin Power & Electricity department chuan zing dar 7 aṭanga chhun dar 12 thleng Luangmual Sub-Station-ah hna an thawh ṭhin dawn avangin kawlphetha an titâwp dawn a; hna thawh chhungin Ai­zawl tlâklam veng zawng zawng bakah, Chaltlang, Bawngkawn leh Khatla veng ṭhenkhatte'n power supply an hmu thei dawn lo. P&E chuan mipui hriat­thiamna an ngen a ni.