Sum lak luhna thianghlim lote en dan tâwk Kan thiam a ṭul tawh - CYMA President

Central YMA chuan February 5, Thawhlehni zan khan Vanapa Hall-ah YMA kumpuan 'Ram leh hnam humhalh' hawnna inkhawm an buatsaih. CYMA president Van­lalruata chuan thu sawiin, sum lak luhna thianghlim lote en dan tâwk thiam a ṭul tawh thu a sawi.

CYMA President chuan, ruihhlo vanga mante chhuah zalen thuai an ni ṭhin chu pawi a tih thu sawiin, "Ram leh hnam tana ṭan tlan a hun tawh hle. Sum lak luhna thianghlim lo tih hriat chiante chu eng thilah mah pûr loh ni se, heng mite endan tâwk thiam a ṭul tawh hle. Vulh lian tua ṭan loh i tum ṭheuh ang u,"  a ti. 

Vanlalruata chuan, hnam dang thurualpui a, mahni ta ni lo, mahni ta anga sawia hlâwkna têl chíngte chu hnam phatsantu an nih thu sawiin, "Hei hian hnam dangte a tihngampat phah a ni," a ti a; YMA hruaitu leh member zingah hnam dang an sumdawnpui a nih chuan bànsan nghal tur leh, an bànsan thei lo a nih huan YMA aṭanag inhnûkdâwk turin a chah. 

In luah tur nei zingah hnam dang duhsak zawk an awm ṭhin chu ṭha lo a tih thu sawiin CYMA President chuan, "Mizo zirlaite'n khawpuiah in luah tur an hmuh loh ṭhin thu sawi a awm ṭhin. Hetih lai hian, hnam dangte an hnawng ve lo hi a ṭha lo hle. Sum duh vanga mahni hnampui aia hnam dangte duhsakna hian hnam ralna a thlen thei," a ti. 

Vanlalruata chuan, Mizorama Chakma awmte'n dan loa Chakma Mizorama lutte an ngaithei lo anga sawi ṭhin chu thu belhchian dâwl lo a nia sawiin, "CADC area-ah vawi tam tak kan kal tawh a, hetiang thil hi kan la tawng lo," a ti a; dan loa Chakma awmte ngaitheilo tak tak ni se, Chakmate'n CAB pass turin Union Home Minister an sawipui a rin loh thu a sawi.

Tripura refugee camp-a Bru-te chungchangah CYMA President chuan, "Supreme Court-ah Mizote dik lo taka min hêk avangin a chhan lêt nan sum tam tak sen a ngaih phah. Ṭha taka rawn lêt tura tih an nih hnuah leh kum 20 liam hnuah pawh chhuanlam hrang hrang siamin an rawn lêt duh lo a, vote thlak an tum ziah lawi si hi tihtawp thuai a ṭul," a ti.

CYMA President sawi danin, kumin chhungin ruihhlo vangin mipa pali leh hmeichhia pakhat an thi tawh a; ruihhlo man pawh tam mah se, a pung tual tual zawk. Kumtlinglo ruihhlo ti thar an pung a, veng tinah an awm a ni.

Kumpuan hawn inkhawm hi CYMA vice president R Lal­ngheta'n a kaihruai a, treasurer Lalrochhuanga Pachuau chuan 'YMA Kalphung' tih thupui sawi­in, assistant secretary Peter Chhak­chhuak-in CYMA hmalakna hrang hrangte a tarlang.