Leilung hausaknate hâi chhuak turin ṭan kan la - Dr K Beichhua

Sericulture minister Dr K Beichhua chuan, nimin khan Aizawl leh Aizawl dáia Sericulture department hmunte a tlawh a; leilung hausaknate hai chhuak tura ṭan an lâk tur thu a sawi.

Dr K Beichhua hian pangang chi siamna hmun Rangvamuala Sericulture Farm, Zemabawk North-a Sericulture Complex leh Chaltlanga Sericulture Emporium-te a tlawh a; an hnathawh dan leh an mamawhte a enfiah a ni.

Sericulture Minister chuan Pathianin ram ṭha tak Mizote a pek thu sawiin, "Kan ram leilung hausakna hi hai chhuah loh tam tak a la awm. Kan sik leh sa ngaihtuahin horticulture leh sericulture hmangin ram hausakna hai chhuah tur a tam a ni, chumi hai chhuak tur chuan theihtawp kan chhuah dawn. Department-a thawktute bakah mipui an pawimawh," a ti.

Dr K Beichhua chuan, sericulture tihhmasawnna atan nasa taka rilru an sên thu sawiin, "Sericulture department-in state-ah hmasawnna hnathawhna tur budget a nei ngai lo a, state budget aṭanga hmalak a nih ve theihna turin CM ka sawipui ang," a ti a; budget tharah chuan Sericulture department-in budget-ah hmasawnna hnathawhna tur a neih ve tawh ngei a beisei thu a sawi.

Sericulture secretary Vanlalduhsaka sawi danin, Sericulture department hnuaiah mi 5,700 velin pangang an kháwi a, ṭum khatah Rs. 30,000 man vel an hralh thei a, kum khatah vawi 5-6-te hralh tur an nei hman. Làte chu sawngbawl chuan kg. khat Rs. 7,000 vel a ni a, mahse, a tam zawk chu sawngbawl loha hralh a ni.