Handloom Fair 2019 ṭan a ni

Federation of Mizoram Handloom & Handicrafts (ZOHANDFED) chuan nimin khan ni li awh tur 'Handloom Fair 2019' chu Aizawl Convention Centre sakna hmun atana ruahman, Khatlaa Commerce & Industries Directorate kawtah an buatsaih a, MJA president Zonunsanga Khiangte-in a hawng.

MJA President chuan, Mizote kutchhuak Mizoram pawn lama hralh leh thawn chhuah tam chu puantah leh a kaihhnawih thilte a nih thu sawiin, "State dang leh ram dang thlengin kan tualtah puante chu kan hnam pho­langtu, hnam dangte mit­hmuha Mizo hmel tilangtu a ni," a ti a; puantahtute'n design thar an ngaihtuah chhuak zelte chu lawm­awm a tih thu leh ṭha zawkin tah zel se a duhsak thu a sawi.

Zonunsanga Khiangte chuan, puantahtute'n sorkar puihna an dawng tlem hle nia sawiin, "North east state dangte'n an tualchhuak thil siamte tihhmasawn an ngaih pawimawh viau laiin, keini state-ah chuan department pakhat hnuaiah tereuhtêa a la awm te, state khat ve riang ruangin tun thlenga hetiang pho chhuahna tur hmun nghet - exhibition hall kan la nei lote hi a zahthlakin sorkar mualphona a tling a ni," a ti.

ZOHANDFED president Kapthangvunga chuan, handloom fair neihna tur hmun an zawn rei thu leh hmun remchang an hmuh mai loh thu sawiin, "Sorkar thuneitute pawh vawi tam kan sawipui tawh chungin, tun thlengin a tak a la thleng thei lo a ni," a ti a; handloom tluka industry hlawhtling Mizoramah a vânga an hriat thu a sawi.

Handloom Fair 2019 hi February 9 thleng neih a ni dawn a; stall 10 chuang a awm a, an thil zawrh­te chu 10%-in an titlawm a ni.